Almaty aıaldamalarynda jańa elektrondy taqta paıda bola ma
ALMATY. QazAqparat - Almaty qalalyq mobıldilik basqarmasy aıaldamalardaǵy elektrondy aqparattyq taqtalar týraly aıtty, dep habarlaıdy QazAqparat tilshisi.
«Qazirgi ýaqytta Almatyda qoǵamdyq kólikter toqtaıtyn oryndarynda barlyǵy 9 elektrondy aqparattyq taqta ornatylǵan. Atap aıtar bolsaq, N. Nazarbaev pen Abaı dańǵyldarynyń qıylysynda jáne Tımırıazev kóshesiniń boıynda 8 BRT aıaladamasynda»,- dep jaýap berdi Almaty qalalyq mobıldik basqarmasy QazAqparattyń saýalyna.
Basqarma málimetinshe, barlyq elektrondy aqparattyq taqtalar áleýmettik jaýapkershilik sheńberinde «Almaty qalasynyń kólik holdıngi» JShS (ONAI), qarajatyna ornatyldy. Qalalyq bıýdjetten bul maqsattarǵa qarajat bólingen joq.
«Qalalyq bıýdjet esebinen aıaldamalarǵa elektrondy taqtalar ornatý máselesi qazirgi ýaqytta pysyqtaý jáne zertteý satysynda. Sonymen qatar, elektrondy aqparattyq taqtalardyń ornatylýy BRT jelisi qurylysynyń ekinshi kezeńiniń jobasy úshin qarastyrylǵanyn habarlaımyz «, - dep atap ótti basqarmadaǵylar.
