Almaty avtodılerlerine monopolııaǵa qarsy zańnamany buzǵany úshin eskertý jasaldy
ALMATY. QazAqparat – Básekelestikti qorǵaý jáne damytý agenttiginiń Almaty qalasy boıynsha departamenti qaladaǵy iri avtosalondardyń áreketinen monopolııaǵa qarsy zańnamany buzý belgilerin anyqtady, dep habarlaıdy QazAqparat tilshisi vedomstvonyń baspasóz qyzmetine silteme jasap.
«Jańa avtokólikterdi satý naryǵyndaǵy básekelestik jaǵdaıyn taldaý nátıjeleri, sondaı-aq Almaty qalasy prokýratýrasynyń materıaldary negizinde, «Astana Motors Motor Company» JShS (Hyundai Premium Almaty, Hyundai Auto Almaty, Hyundai Premium Batys, Súıinbaıdaǵy Toyota Center), «Orbis Auto» JShS (Nissan Center, Toyota City, Volkswagen Center) jáne «Toyota Tsusho Kazakhstan Auto» JShS (Toyota Center Jetisý, Lexus Center Almaty) áreketterine qatysty, ústem jaǵdaıdy teris paıdalaný bóliginde, tutynýshylarǵa qosymsha taýarlardy tańý jáne avtokólikterdi satý boıynsha qyzmetter kórsetýde, Qazaqstan Respýblıkasynyń básekelestik zańnamasyn buzý belgileri anyqtaldy», - delinedi agenttiktiń habarlamasynda.
Vedomstvonyń málimetinshe, 27 maýsym kúni atalǵan naryq sýbektilerine mundaı zańbuzýshylyqtardy toqtatý jáne aldaǵy ýaqytta oǵan jol bermeý qajettigi týraly habarlamalar jiberilgen.
«Kásipkerlik kodekstiń normalaryna sáıkes, naryq sýbektisi habarlamada kórsetilgen áreketterdi belgilengen merzimderde toqtatpasa, monopolııaǵa qarsy organ tergep-tekserý júrgizý týraly sheshim qabyldaıdy. Habarlamany oryndaýdyń jáne onyń oryndalǵany týraly aqparatty usynýdyń sońǵy merzimi ony naryq sýbektisi alǵan kúnnen bastap kúntizbelik otyz kúndi quraıdy», - dep túsindirdi agettikte.
