Almaty aýyr mashına jasaý zaýytyn qala syrtyna kóshirý úshin 60 mlrd teńge qajet – Erbolat Dosaev
Almaly aýdanynyń turǵyny 600 otbasynyń atynan ákimge júgindi. Onyń aıtýynsha, olardyń turǵyn úı kesheni Tóle bı-Jarokov mekenjaıy boıynsha Almaty aýyr mashına jasaý zaýytynyń (AZTM) janynda ornalasqan.
«Biz jańa úıge 2021 jyly kirdik. Qazir turǵyndar kúrdeli máselege tap bolyp otyr. Bizdiń úıdiń janynda ornnalasqan aýyr mashına jasaý zaýyty aýaǵa zııandy zattar shyǵarady, qatty shý estiledi. Ekologııa basqarmasy men qalalyq sanıtarııalyq-epıdemıologııalyq baqylaý departamentine júgindik, alaıda áli kúnge deıin mardymdy jaýap almadyq. Al zaýyt ókilderi bolsa, bizge bul aýmaqta shyǵaryndylardy shyǵaratyn ónerkásiptik kásiporyndardyń kóp ekenin aıtty. Budan bizdiń balalarymyz ben densaýlyǵymyz zardap shegedi. Bul zaýyt qalanyń syrtyna shyǵaryla ma?» — dep surady almatylyq áıel Almaly aýdany turǵyndarymen kezdesýge kelgen ákimnen.
Óz kezeginde Erbolat Dosaev Almaty aýyr mashına jasaý zaýytyn basqa jerge kóshirýge tyrysamyn dep jaýap berdi.
«Atalǵan zaýytqa qatysty bizde ıdeıa bar. Kóshirýge tyrysamyz. Zaýytta búginde 350-ge jýyq adam jumys isteıdi. Qalada ekinshi jobamyz da bar – Kırov atyndaǵy zaýyt. Olardy qaıta qurýdy boljap otyrmyz, biraq másele qarjysynda bolyp tur. Zaýytty kóshirýdiń naqty merzimin aıta almaımyn. Óıtkeni, oǵan shamamen 40-tan 60 mlrd teńgege deıin qarajat qajet», - dedi ákim.
Al, ákimniń orynbasary Álisher Ábdiqadyrov qazir kóshirý jumystary júrip jatqanyn aıtty. Onyń sózinshe, barlyq iri ónerkásiptik kásiporyndar qalanyń shetine kóshiriledi. Bul álemdik tájirıbe.
Aıta keteıik, Almaty aýyr mashına jasaý zaýyty» 1941 jyly negizi qalanǵan iri kásiporyn. Alǵashynda soǵysqa qajetti ónim shyǵarǵan óndiris 1946 jyldan bastap beıbit maqsattaǵy mıssııaǵa kóshken. Sol jyldardan bastap metallýrgııaǵa qajetti qural-jabdyq óndirisi jolǵa qoıylyp keledi.
