Almaty aýrýhanasynda patsıentterdiń VICh juqtyrýyna kim kináli – Esmaǵambetova jaýaby
ASTANA. QazAqparat – Arnaýly komıssııa Almaty qalasynyń ortalyq klınıkalyq aýrýhanasynda 3 patsıenttiń VICh juqtyrý faktisi boıynsha kinálilerdi anyqtaý úshin tergeý barysynyń barlyq materıalyn tıisti organdarǵa jiberdi. Bul týraly Densaýlyq saqtaý vıtse-mınıstri – Bas memlekettik sanıtarııalyq dáriger Aıjan Esmaǵambetov aıtty, dep habarlaıdy QazAqparat tilshisi.
«100 paıyz senimdilikpen medbıke atalǵan shprıtsti paıdalandy ne paıdalanbady dep aıtýǵa bolmaıdy. Jansaqtaýda teri betiniń manıpýlıatsııasymen baılanysty barlyq medıtsınalyq burmalaý oryn alýy múmkin. Biraq, komıssııa dál sol adam boldy dep aıta almaıdy. Tyńǵylyqty tergeý júrgizý úshin barlyq materıal tısti organdarǵa jiberildi. Olar atalǵan patsıentterge medıtsınalyq kómek kórsetýge qatysqan qyzmetkerlerdiń jaýapkershiligin nemese kerisinshe kináli emestigin aıqyndaıtyn bolady», - dedi Aıjan Esmaǵambetova Úkimet otyrysynan keıin BAQ ókilderiniń saýalyna oraı.
Onyń dereginshe, jansaqtaý bóliminde shamamen 50 adam jumys isteıdi. Olardyń qatarynda dárigerler, kishi jáne orta medıtsınalyq qyzmetkerler bar.
«Jansaqtaý bólimshesiniń patsıentteri ózderiniń densaýlyq jaǵdaıyna baılanysty túrli manıpýlıatsııa alady. Bul – ekpe, sıstema, kateter jáne basqalary. Eger VICh-ınfektsııasynyń juǵýyn qaraıtyn bolsaq, onda ol qandaı da medıtsınalyq manıpýlıatsııanyń buzylýymen baılanysty. Ókinishke oraı, dál sol manıpýlıatsııa patsentterdiń aýrý juqtyrýyna sebep boldy dep komıssııa naqty aıta almaıdy», - dedi vıtse-mınıstr.
Buǵan deıin Almaty qalalyq ortalyq klınıkalyq aýrýhanasynda jatqan 3 naýqastan adamnyń ımmýndyq tapshylyq vırýsy anyqtalǵanyn jazǵan edik.
