Almaty aýrýhanalaryndaǵy tósek-oryn 10 myńǵa deıin ulǵaıtylýy múmkin
ALMATY. QazAqparat – Almaty qalalyq Qoǵamdyq densaýlyq saqtaý basqarmasy koronavırýs boıynsha birneshe stsenarıı ázirledi. Jaǵdaı ýshyǵatyn bolsa, statsıonarlardaǵy tósek 10 myńǵa deıin ulǵaıtylýy múmkin.
Bul týraly onlaın brıfıng barysynda Narıman Tabynbaev málim etti, dep habarlaıdy QazAqparat tilshisi.
«Koronavırýstyń tórtinshi tolqynyna daıyndyq júrip jatyr. Biz 3 túrli stsenarıı ázirledik. Birinshisi, ol bir táýlikte 400 -den 800-ge deıin jaǵdaı tirkeletin bolsa, onyń ishinde 450 naýqas aýrýhanaǵa tússe, onda tósek-oryn sanyn 3700 deıin kóbeıtemiz. Oǵan 4460 medıtsına qyzmetkeri jumyldyrylady. Ekinshisi, ıaǵnı bir táýlikte 1200-1500 koronavırýs jaǵdaıy anyqtalsa, onda tósek-oryn 7 myńǵa deıin ulǵaıtylady. Medıtsına mamandarynyń sany alty myńnan asatyn bolady. Úshinshi satysy, jaǵdaı kúrdelenetin bolsa, onda statsıonarlardaǵy tósek oryndy 10 myńǵa deıin jetkizemiz»,- dedi basqarma basshysy.
Buǵan deıin, Jandarbek Bekshın koronavırýstyń tórtinshi tolqyny bastalýy múmkin ekenin málim etken bolatyn.
Onyń aıtýynsha, buǵan deıin brıtandyq «alfa» shtammy koronavırýstyń úshinshi tolqynyna sebep bolǵan. Osy joly «delta» shtammy tórtinshi tolqyndy týǵyzýy ábden múmkin.
