Almaty aýrýhanalary qaǵazbastylyqtan arylady - Baıbek
ALMATY. QazAqparat - Almaty ákimi Baýyrjan Baıbek halyqpen esepti kezdesýinde qalanyń bolashaqtaǵy áleýmettik damý baǵyty týraly tilge tıek etti, dep habarlaıdy qazAqparat tilshisi.
Shahar basshysy qalanyń bolashaqtaǵy baǵyty 2020 jylǵa deıingi damý baǵdarlamasyna saı órbıtinin aıtty.
«Elbasy aıtqandaı, bizdiń basty baılyǵymyz - adam kapıtaly, turǵyndarymyz. Eń aldymen qaladaǵy bilim berý, densaýlyq saqtaý salasyna basymdyq berilmek. Almatylyqtardyń ortasha ómir súrý uzaqtyǵy respýblıka boıynsha birinshi orynda tur. Eń bastysy qalalyqtardyń medıtsınalyq qyzmetti paıdalanýlaryna yńǵaıly jaǵdaı jasalmaq. Qazir arnaıy portal arqyly almatylyqtar dárigerge jazylyp, úıge dáriger shaqyrta alady. Byltyr tsıfrlyq formatta 1 mln 300 myń qyzmet kórsetilgen. Engizilgen jańa tehnologııalar jedel járdemniń naýqastarǵa jetý jyldamdyǵyn 30 paıyzǵa arttyrǵan», - dedi ákim.
Onyń aıtýynsha, aldaǵy jyldary Almatyda aýrýhanalar qaǵazsyz jumys jasaıtyn bolady.
«Dárigerler 5 mınýt adamdy qarasa, 20 mınýt jazady. Bul olqylyqtyń bári tsıfrlyq tehnologııalardyń arqasynda joıylatyn bolady», - dedi qala basshysy.
Baýyrjan Baıbek Almatyda medıtsına salasynyń ınvestıtsııalyq turǵydan tıimdi ekendigin atap ótti.
«Qazaqstandyqtar bir jylda shetelge baryp emdelýge 500 mln dollar qurtady eken. Osyndaı sapaly medıtsınalyq qyzmet kórsetý úshin birqatar sheteldik ınvestor zamanaýı klınıka salyp jatyr. Eger bul salada aqsha bolmasa, bul kompanııalar qarjy salmas edi», - dedi B.Baıbek.
