Almaty aýmaǵy beı-bereket jaıylyp, úılesimsiz ósti – Erbolat Dosaev
«Qala óte tez ósti, sondyqtan megapolıs pen onyń turǵyndarynyń qajettilikterin qanaǵattandyrý úshin shuǵyl sheshimder qabyldaý kerek boldy. Onyń ústine, qala úılesimsiz ósti, óıtkeni, 1 mıllıon adamǵa ǵana eseptelgen»,- deıdi ákim.
Onyń aıtýynsha, ár qala óz damý jolyn tańdaýy tıis.
«Qalanyń damý josparyna jańadan qosylǵan aýmaqtar men Almatynyń jańa aýdandaryn qurý máselesi úlken ózgerister engizdi. Biz búgin izdenis ústindemiz. Qala qalaı damyǵany jón - osyny anyqtaý qajet. Ár qala óziniń damý jolyn tańdaıdy. Aldyn ala aıtarym, aldaǵy dúısenbide qalaǵa qatysty mańyzdy sheshimder qabyldaıtyn máslıhat otyrysy ótedi. Bul – qurylys erejelerin ózgertý jáne qala qurylysy keńesin qaıtarý týraly sheshimder»,- dedi qala basshysy.
Sonymen qatar, ol 2023 jyldan bastap qalanyń sáýlet beınesine konkýrs jarııalanatynyn aıtty.
«Kreatıvti ekonomıkany damytý reıtıngi boıynsha elimizde kóshbasshy pozıtsııasynda turmyz. Almaty turǵyndary óte daryndy. 2023 jyldan bastap qalanyń arhıtektýralyq beınesine konkýrs jarııalanady. Biz endi bir nusqany qabyldamaımyz, qala eń jaqsy jobalardy tańdaýǵa quqyly bolady. Kompanııalar úshin jer aýktsıondary uıymdastyrylady. Eń jaqsy jobany kim usynsa, qala soǵan artyqshylyq beredi. Onyń ústine jeke ınvestıtsııanyń rólin arttyrý kerek dep sanaımyn, sondyqtan jekemenshik ıeleri qalaǵa, elge ǵana emes, ózderi úshin de qalatyn aktıvti alǵysy nemese salǵysy keledi»,- dedi Erbolat Dosaev.
Megapolıs basshysy bas josparǵa sáıkes qala úshin jarǵy nemese kodeks bolýy kerek ekenin tilge tıek etti.
«Almaty buryn salynǵan sáýlet jetistikterimen ómir súrip jatyr. Olardy árleımiz ári retke keltiremiz. Shyn máninde, jańa Almatynyń, jańa Qazaqstannyń sımvolyna aınalǵan nárseler saýsaqpen sanarlyq. Men olardyń kóp bolǵanyn qalaımyn. Ol úshin jaǵdaı jasaımyz. Turǵyn úı qurylysynyń shekarasyn naqty bólýimiz kerek. Sondaı-aq, qala arhıtektýrasy degen ne jáne turǵyn úımen qamtamasyz etý túrindegi áleýmettik problemalardy sheshý degen eki máseleni bólip qaraǵan jón. Bas josparǵa sáıkes qala úshin jarǵy nemese kodeks bolýy kerek jáne ol qatań saqtalýy tıis»,- dedi ol.
