Almaty áýejaıynyń prezıdenti ushaq apaty týraly aıtty

ALMATY. QazAqparat – Almaty áýejaıynyń prezıdenti Bolat Erjanov ushaq apatyna baılanysty oıyn aıtty, dep habarlaıdy QazAqparat tilshisi.

«Bek Air áýe kompanııasynyń Almaty-Nur-Sultan baǵytyndaǵy №2100 reısin oryndaǵan Foker-100 ushaǵy apatqa ushyrady. Áýe kemesiniń komandıri Muratbaev, ekinshi ushqysh Moldaǵulov, 3 bort-serik bolǵan. Barlyǵy 5 ekıpaj múshesi boldy. Bortta 93 jolaýshy otyrǵan. Onyń ishinde 85 eresek adam, 5 úlken bala, 3 kishkentaı bala. Bortta 603 keli bagaj, 613 keli júk bolǵan», - dedi Bolat Erjanov.

Onyń aıtýynsha, reıske tirkeý 5:35-te bastalǵan.

«Ushaq 7:21-de áýege kóterildi. 7:25-te qaýip dabyly qaǵyldy. 7:40-ta ushaq radardan joǵalyp ketkeni týraly habarlama tústi. Oqıǵa ornyna birinshi áýejaı qyzmetkerleri jetti», - dedi áýejaı basshysy.

Aıta keteıik, búgin tańda Almatydan Nur-Sultan qalasyna ushyp shyqqan ushaq radardan joǵalyp ketti.

Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty. Osy apatqa qatysty shuǵyl jeli iske qosylǵan.

QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi. Elbasy Nur-Sultan Nazarbaev jolaýshylar ushaǵynyń apatqa ushyraýyna baılanysty kóńil aıtty.

Foto: abilet.kz