Almaty áýejaıynyń ǵımaraty tarıhı eskertkish bolsa, nege jeke menshikke satyldy – Mınıstrlik jaýap berdi
NUR-SULTAN. QazAqparat – Almaty áýejaıynyń ǵımaraty tarıhı eskertkish bolsa, nege jeke menshikke satyldy? Ortalyq kommýnıkatsııalar qyzmetinde ótken brıfıngide Mádenıet jáne sport mınıstrliginiń ókilderine osyndaı saýal qoıyldy, dep habarlaıdy QazAqparat tilshisi.
«Almaty qalasy ákimdiginiń 2010 jylǵy qazandaǵy qaýlysy boıynsha Almaty áýejaıy tarıhı qundylyǵy bar nysan retinde belgilengen jáne buzýǵa jatpaıtyny kórsetilgen. Soǵan qaramastan, áýejaı ǵımaratyn jeke menshikke satyp jiberdi. Eger atalmysh qadamǵa tyıym salatyn normatıvtik-quqyqty akt bolsa, áýejaı ǵımaraty nege jeke menshikke satyldy? Onyń negizdemesi qandaı? Áýejaı ǵımaraty mádenıet eskertkishi bolsa, menshik ıesi ony buza ala ma?», - dep surady BAQ ókili.
Mınıstr Aqtoty Raıymqulovanyń aıtýynsha, mundaı máselemen arnaıy komıssııalar aınalysady.
«Zań boıynsha mádenıet eskertkishterine qater tónetin bolsa, jeke menshikke berilmeý kerek dep durys aıtyp otyrsyz. Shyn máninde tarıhı-mádenı mura men mádenıet eskertkishteri, qala qurylysynyń eskertkishteri zańmen qorǵalady. Ol tizimnen bul nysandar tolyqtaı jaramsyz bolyp qalǵanda ǵana shyǵarylady. Ol úshin arnaıy komıssııa belgili bir zertteýler júrgizip, eskertkishti qalpyna keltirý múmkin emes degen qorytyndy shyǵarýy kerek», - dedi vedomstvo basshysy.
Aıtýynsha jýrnalıst aıtyp otyrǵan nysan qala qurylysy eskertkishi bolyp sanalady.
«Meniń oıymsha, bul jeke jaǵdaı, bólek qaraý kerek. Ózim qadaǵalaýǵa alam. Eskertkish Almaty qalasynda ornalasqandyqtan, Almatydaǵy komıssııa qaraǵan bolsa kerek. Tipti jeke qolǵa bergenniń ózinde jeke menshikke emes, senimgerlik basqarýǵa tapsyrǵan bolýy kerek dep oılaımyn. Shyn máninde normalar bul tarıhı-mádenı eskertkishti saqtaý boıynsha óte qatań saqtalýy kerek», -dedi Aqtoty Raıymqulova.
Al vıtse-mınıstr Nurqısa Dáýeshovtiń aıtýynsha, Almaty qalasyndaǵy áýejaıdyń búkil aýmaǵy tarıhı eskertkishke jatpaıdy.
«Almaty qalasyndaǵy áýejaıdyń qasyndaǵy ǵımarattyń belgili bir bóligi ǵana tarıhı eskertkish bolyp sanalady. Zań boıynsha Almaty qalasynyń ákimdigi arnaıy saraptamalyq komıssııanyń sheshimin alady. Sondyqtan komıssııanyń sheshimi tolyq áýejaıdy emes, tarıhı bóligin ǵana alyp otyr. Oǵan arnaıy mamandardyń qorytyndysy beriledi. Soǵan baılanysty jumystar ári qaraı júrgiziledi», - dedi mınıstrdiń orynbasary.
