Almaty áýejaıynyń aýmaǵy eki ese ulǵaıady
ALMATY.QazAqparat - Almaty qalasy ákiminiń orynbasary Erlan Áýkenov Facebook jelisindegi paraqshasy arqyly qala áýejaıyndaǵy qyzmet sapasyn arttyrý maqsatynda sońǵy 2 jylda atqarylǵan sharalar týraly aıtty, dep habarlaıdy «QazAqparat» HAA.
«Almaty áýejaıynyń jaǵdaıy 2017 jylǵa deıin múshkil boldy. Aýa raıynyń kúrdeligine baılanysty jylyna 200 reıs bógelip qalatyn. Áýe kompanııasynyń shyǵyndary 1 mlrd teńgege deıin jetti. 30 myńǵa jýyq jolaýshy reıstiń keshigýinen zardap shekti», - dedi ákimniń orynbasary.
Onyń aıtýynsha, osy tektes problemalar álemniń birqatar áýejaılarynda Gelmýt Shmıdt (Gambýrg, Germanııa), Aýrel Vlaıký (Býharest, Rýmynııa), Don Mýang (Bangkok, Taıland) áýejaılarynda bolǵan.
Bul túıtkildi máseleniń sheshimi retinde ushý-qoný jolaǵynyń qaıta jasaý, aımaqty keńeıtý, jańa termınaldardy ashý sııaqty sharalar atqaryldy.
Sońǵy eki jylda Almaty áýejaıynda eki ushý-qoný jolaǵyna jóndeý jumystary júrgizilip, jol shetine zamanaýı jaryqtandyrý quraldary qoıyldy. Buǵan 8 mlrd teńge kóleminde jeke ınvestıtsııa tartyldy.
Sonyń nátıjesinde áýejaı aýa raıynyń qolaısyzdyǵyna qaramastan áýe kemelerin qabyldaı bastady. Saǵatyna 8-20 ushaq qabyldaı alady. Jolaýshylar aınalymynyń kórsetkishi de jylyna turaqty 5,8 mıllıonǵa jetti.
«Jumystar munymen bitpeıdi. Aldaǵy ýaqytta áýejaı ǵımaraty eki esege ulǵaıatyn boldy. Qazir qasyna ǵımarat qosý týraly tujyrymdama daıyndalyp jatyr. Bul áýejaı alańyn 2,5 ese ulǵaıtýǵa múmkindik beredi. Jolaýshylar sanyn jylyna 13 mıllıonǵa jetkizý, eki teleskopııalyq trap, avtoturaqty 2 myń orynǵa deıin keńeıtý josparda bar», - dedi Erlan Áýkenov.
Sonymen qatar, borttan tamaqtanýdy qamtamasyz etetin jańa tsehtyń jobasy aıaqtaldy. Tsehta táýligine 15 myń portsııa tamaq jasalady. Qurylys 2019 jyly bastalady.
