Almaty áýejaıynyń ataýy jaqyn arada ózgermeıdi
Bul týraly QazAqparat tilshisiniń arnaıy saýalyna jaýap bergen qalalyq tilderdi damytý basqarmasynyń onomastıka bóliminiń basshysy Qalabaı Ótepbergen aıtyp berdi.
«Almaty áýejaıynyń ataýyn aýystyrý máselesi Almaty qalasy ákimdigi janyndaǵy onomastıka komıssııasynyń jumys josparynda joq. Óıtkeni bul týraly qala turǵyndary men qoǵamdyq uıymdar tarapynan usynys túsken joq. Mundaı másele tek usynys bolǵan jaǵdaıda ǵana qaralady», - dedi Ó.Qalabaı.
Onyń aıtýynsha, qazirgi tańda respýblıka boıynsha kóshelerge ataý berýge qatysty moratorıı merzimi áli kúshinde.
Soǵan baılanysty qala turǵyndarynyń turmys tirshiligin qıyndatatyn erekshe jaǵdaılarda ǵana kóshelerge ataý berý máselesi qolǵa alynyp, onomastıkalyq komıssııada qaralady.
2017 jyly Almatyda birinshi kezekte ataýy joq nemese ataýy qaıtalanatyn kóshelerdiń aty aýystyrylady.
«Almatyda 27 eldimeken qosylǵaly beri 457 kósheniń ataýyn ózgertýge týra keledi. Qazirdiń ózinde Almatyda 12 Abaı, 3 Áýezov, 13 Jambyl Jabaev, 6 Qurmanǵazy, 5 Tóle bı, 3 Qazybek bı, 3 Áıteke bı, 3 Qabanbaı, 8 Raıymbek, 4 Naýryzbaı, 8 Qarasaı, 4 Baıtursynov, 5 Seıfýllın, 6 Álııa Moldaǵulova, 6 Mánshúk Mámetova, 5 Qonaev kóshesi bar. Birinshi kezekte sol kóshelerdiń ataýyn ózgertý boıynsha jumys jasalmaq», - dedi bólim basshysy.
