Almaty áýejaıyndaǵy «órtenip jatqan ushaq» sóndirildi
ALMATY. QazAqparat - Almaty áýejaıy «tótenshe jaǵdaıǵa» baılanysty ýaqytsha jabyldy, dep habarlaıdy QazAqparat tilshisi.
Áýejaıdyń oqý jattyǵý polıgonynda «Almaty halyqaralyq áýejaıy» AQ izdestirý jáne ushýlardy apattyq qutqarý qyzmetiniń bazasynda jattyǵý jumystary júrgizildi.
Atap aıtqanda, qutqarý komandalary jerge tógilip, órtengen jaǵarmaıdy sóndirdi.
«Biz komandalardyń birligin, órtti óshirý daǵdysyn tekserip jatyrmyz. Adamdardy tótenshe jaǵdaı kezinde qalaı kóshirý kerektigin tekserdik. Osyǵan baılanysty áýejaı ýaqytsha jabyq tur», - dedi qyzmet basshysy Marat Zakırov
Aıta ketý kerek, búgin almatylyqtar áýejaıda órtenip jatqan ushaqty kórip, áleýmettik jelide bólise bastaǵan edi.
