Almaty áýejaıynda jolaýshylardyń mazasyn alǵan 95 taksıst jazalandy
ALMATY. QazAqparat – Almatynyń qoǵamdyq oryndarynda azamattardyń mazasyn alǵan 95 jekemenshik taksı júrgizýshisi ákimshilik jaýapkershilikke tartyldy, dep habarlaıdy QazAqparat tilshisi.
Bul – jyl basynan bergi málimetter.
«WhatsApp-taǵy senim telefonymyzǵa jıi túsetin shaǵymdardyń biri – jeke taksı júrgizýshileri jolaýshylarǵa qyzmetterin eshbir mádenıetti saqtamaı usynýy. Bul máseleni Almaty áýejaıyndaǵy tártip saqshylary únemi qadaǵalap otyrady. Polıtsııa departamentiniń qyzmetkerleri Almaty áýejaıynda qoǵamdyq tynyshtyqty qadaǵalaıdy. Sonyń ishinde jeke taksı júrgizýshileri men sálemdeme berip jiberetin azamattardyń da tártibi nazarda»,– dep málim etti Almaty áýejaıynyń baspasóz qyzmetinen.
Sonymen, aǵymdaǵy jyldyń 9 aıynda qoǵamdyq oryndarda jolaýshylardyń mazasyn qashyrǵan 95 adam ákimshilik jaýapkershilikke tartyldy. Olardyń segizi atalǵan zańbuzýshylyqty birneshe ret qaıtalaǵan. Nátıjesinde 17 adamǵa jalpy somasy 277 750 teńge aıyppul salyndy, úsheýi úsh táýlikke qamaýǵa alyndy, bireýi elden shyǵaryldy.
«Biz kóptegen jolaýshylar talap etkendeı, bul máseleni túbegeıli sheshe almaımyz. Sebebi, eshkimniń jeke avtokólik ıelerin áýejaıdaǵy turaqtan qýyp shyǵýǵa quqyǵy joq. Óıtkeni bul aımaq qoǵamdyq bolyp tabylady. Olar tarıf boıynsha turaqqa aqy tóleıdi. Sondaı-aq, taksı júrgizýshileriniń basym bóligi jeke kásipker bolyp sanalady. Olar zań boıynsha tirkelgen. Bizge bul máseleni sheshýge, qurmetti jolaýshylar aıtarlyqtaı kómektese alady. Eger taksı júrgizýshileri nemese sálemdeme berip jiberetin azamattar mazalaryn alsa, onda polıtsııaǵa aryz túsire alady», - dedi kompanııanyń baspasóz qyzmetinen.
