Almaty áýejaıynda jolaýshylar men qala qonaqtarynyń sany kúrt ósken
ALMATY. QazAqparat - Bloger Maqpal Imanova Instagram paraqshasynda Almaty áýejaıynda qalyń nópir halyqtyń kóptigine shaǵymdandy, dep habarlaıdy QazAqparat tilshisi.
Blogerdiń aıtýynsha, qalyń nópir adamnyń ortasynda bireý ózin nashar sezingen.
«Almaty halyqaralyq áýejaıy. Bir saǵatqa jýyq ýaqyt ótti, adamdar áli ornynan jyljymaı kezekte tur. Qalyń nópirdiń ortasynda bireýler bir kisiniń ózin nashar sezingenin aıtyp, aıqaılady. Narazy jolaýshylar kondıtsıonerdi búkil qýatyna qosyp, barlyq adamǵa sýdyń taratylýyn surady. Biraq áýejaı personaly olardy qulaqqa ilgen joq», - dep jazdy Maqpal Imanova.Osyǵan oraı, Almaty halyqaralyq áýejaıy jazǵy demalys kezinde reısterdiń kóbeıýine baılanysty áýejaıda jolaýshylar men qala qonaqtarynyń sany kúrt óskenin habarlady.
«Qazirgi ýaqytta Almaty halyqaralyq áýejaıynyń aýmaǵynda qosymsha kezekter men keptelister baıqalýy múmkin. Biz ótkizý qabileti 7 mln adamdy quraıtyn jáne qalamyzdyń turǵyndary men qonaqtaryna qajetti jaılylyq pen yńǵaılylyqty qamtamasyz etetin jańa halyqaralyq jolaýshylar termınalynyń qurylysyn tezirek aıaqtaýǵa kúshimizdi salamyz. Almaty halyqaralyq áýejaıynda jolaýshylar aǵynynyń ulǵaıýyna baılanysty tehnıkalyq departament jelilerdiń jumysyn jaqsartý úshin sharalar qabyldaıdy. Onyń ishinde jolaýshylar aǵynynyń ósýin eskere otyryp, qazirgi derekterge sáıkes keletin ınjenerlik jelilerdiń jobasyn ázirleıdi», - dep habarlady áýejaıdyń baspasóz qyzmeti.
Áýejaı sondaı-aq búgingi kúni áýejaı termınalynyń ótkizý qabileti jylyna 2,7 mln jolaýshyny quraıtynyn málim etti.
«Almaty halyqaralyq áýejaıy 2022 jyly 7,2 mln-nan astam jolaýshyny qabyldady, bıyl jolaýshylar aǵynyn 8 mln-ǵa deıin ulǵaıtý josparlanýda», - dep málim etti áýejaıdyń baspasóz qyzmeti.
