Almaty áýejaıynda jolaýshy polıtseıden taıaq jedi

ALMATY. QazAqparat - Almaty kóliktegi polıtsııa departamenti mas jolaýshyny urǵan polıtsııa qyzmetkerine qatysty túsinikteme berdi, dep habarlaıdy QazAqparat tilshisi.Áýejaıda bolǵan tóbelestiń vıdeosy áleýmettik jelide taraldy.

Qalalyq Kóliktegi PD baspasóz qyzmetiniń habarlaýynsha, oqıǵa 2 qarashada bolǵan.

Almaty áýejaıyndaǵy polıtsııanyń jelilik bólimine «FlyArystan» kompanııasynyń qyzmetkerlerinen habarlama túsken.

Qyzmetker Almaty - Qostanaı baǵytynda ushatyn 8-geıtte mas adamnyń shý kóterip jatqanyn aıtqan.

«Tekserý barysynda polıtsııa qyzmetkerleri 36 jastaǵy er adamdy ustady. Kezekshi bólimine jetkizilgen soń da jolaýshy dórekilik tanytty. Balaǵattap, qarsylyq kórsetti. Sondyqtan, polıtsııa qyzmetkeri oǵan kúsh kórsetýine týra keldi. Medıtsınalyq kýálandyrýdyń nátıjesinde ol orta dárejede mas ekeni anyqtaldy», - dedi PD.

Jolaýshyǵa qatysty QR QK 378-babynyń 1-bólimimen qylmystyq is qozǵaldy.

Al búlik shyǵarǵan adamdy ustaýda dórekilik tanytqany úshin polıtsııa qyzmetkeri A. Eleýsizov ishki organdaǵy qyzmetinen qýyldy.

Sonymen qatar, jelilik polıtsııa bóliminiń 8 laýazymdy tulǵasy tártiptik jazaǵa tartyldy.