Almaty áýejaıynda taǵy da reıster keıinge shegerilip jatyr
ASTANA. QazAqparat - Almaty áýejaıynda taǵy da reıster keıinge shegerilip jatyr, dep habarlaıdy QazAqparat.
Qalada aýa raıy ushaqtardyń ushyp-qonýyna qolaısyzdyq týdyryp tur, alaıda reısterdiń keshigýine basqa nárse sebep ekeni aıtylady. Ásirese, Astanaǵa bet alǵan jolaýshylar áýejaıda eriksiz tosylyp tur.
«Bizdiń ushaqtyń ushý ýaqytyn osymen 4-shi ret keıinge shegerdi. Air Astana buǵan ushý jolaǵyndaǵy jóndeý jumystary sebep bolyp otyrǵanyn aıtty. Qysqasy, reısimiz 01:00-ge shegerildi», - dep jazdy jolaýshylardyń biri Facebook-tegi paraqshasyna.
Odan basqa da jolaýshylar Astanaǵa usha almaı turǵandaryn habarlaǵan.
Áýejaı qyzmetkerleri ushý jolaǵynyń biri jóndeý jumystaryna baılanysty jabyq turǵanyn naqtylady. Ekinshi jolaq jolaýshylar ushaǵyn da, júk tasıtyn ushaqtardy da qabyldaýǵa májbúr. Áýejaıdyń baspasóz qyzmeti buǵan deıin, ıaǵnı 28 mamyr kúni ushaqtardyń keshiktirilýi ushý jolaǵyndaǵy bir plıtadan aqaý shyǵýyna baılanysty bolǵanyn da habarlady. Ol 1 saǵat ishinde qalpyna keltirilgen.
Qazirgi sátte Astanadan basqa Qyzylorda, Shymkent, Aqtaý, Atyraý syndy qalalarǵa jolǵa shyqqan jolaýshylar ushaǵyn kútip tur. Al Air Astana jáne Bek Air kompanııalarynyń tańerteń elorda baǵytyndaǵy reısi toqtatyldy.
