Almaty áýejaıynda synap tókken adamǵa qatysty sot úkimi shyqty
ALMATY. QazAqparat - Almatynyń Túrkisib aýdandyq sotynda áýejaıda ózimen birgen synap alyp ótpek bolyp, biraq, alyp kete almaıtynyn bilgendikten ony ádeıi tókken jolaýshyǵa qatysty sot úkimi shyqty, dep habarlaıdy QazAqparat tilshisi qalalyq sottyń saıtyna silteme jasaı otyryp.
E. esimdi jolaýshy QR QK 286-babynyń 2-bóligi, 4-tarmaǵy (tyıym salynǵan zattar kontrabandasy), 301-babtyń 3-bóligi, 2-tarmaǵy (ýly zattardy zańsyz tasymaldaý) boıynsha kináli dep tanyldy.
Sot habarlamasynda, atalǵan zań buzýdyń anyqtalýyna ózi járdem kórsetken. Onyń kómegimen iske qatysty ózge de adamdar anyqtalǵan.
«Sottalýshy óz kinásin tolyǵymen moıyndady. Jasaǵan isine ókinish bildirdi. Asyraýynda úsh bala jáne qart anasy bar. Osyǵan baılanysty, sot QR QK 63-babyn paıdalana otyryp, ony shartty túrde 6 jylǵa sottady», - delingen habarlamada.
Eske sala keteıik, 2016 jyldyń 3 qazanynda «Almaty-Tbılısı» baǵytyndaǵy «Eır Astana» áýe kompanııasynyń № 141 reısindegi jolaýshylardy tekserý barysynda bir jolaýshynyń qol júginen quramynda synaby bar qutydaǵy suıyqtyq baıqalǵan. Suıyq zat teksergende synap bolyp shyqqan. Shamamen 100 ml. Osydan keıin jolaýshy eshkimnen suramastan, ony qoqys shelegine tastaı salǵan. Synap sonda tógilgen. Oqıǵaǵa qatysty sol kúni 6 reıs keshigip ushyryldy.
