Almaty áýejaıynda shetelden kelgen búkil jolaýshy tekserýden ótip jatyr
ALMATY. QazAqparat - Almaty halyqaralyq áýejaıyna keletin barlyq reıs jolaýshylarynyń densaýlyǵy suralyp, termometrııadan tekserýden ótedi. Bul týraly Almaty qalalyq qoǵamdyq densaýlyq basqarmasy basshysynyń orynbasary Laýra Myrzaǵalı aıtty, dep habarlaıdy QazAqparat tilshisi.
Spıkerdiń sózinshe, epıdemıologııalyq baqylaýdyń kúsheıtilgen is-sharalary shetelden keletin ushaqtar men charterlik reısterde birdeı júrgiziledi.
«Áýejaılarǵa tek halyqaralyq qana emes, sonymen qatar ishki reısterdiń tranzıti men kelgen jolaýshylardyń epıdemıologııalyq qadaǵalaýy kúsheıtildi. Feldsherler ushyp kelgen jolaýshylardyń dene qyzýyn ólsheıdi», - dedi qoǵamdyq densaýlyq basqarmasynyń ókili.
Sonymen qatar, ol 2020 jyldyń 6 qazanynan 2021 jyldyń 28 qyrkúıegine deıin Almaty halyqaralyq áýejaıyna 682 768 jolaýshysy bar 4702 reıs kelgenin aıtty.
«Onyń ishinde 589 920 jolaýshy COVID-19 boıynsha teris nátıjemen keldi, 67 291-de vaktsınatsııa tólqujaty bar, 25 557 sertıfıkaty joq, eseptik kezeńde 34 sheteldik azamat sertıfıkattardyń joqtyǵynan Qazaqstannan deportatsııalandy. 25 523 adam PTR analızin tapsyrý úshin karantındik aýrýhanaǵa jatqyzyldy. Kelgenderden 125 oń nátıje alyndy, onyń ishinde 37 jolaýshy Túrkııadan, 35 BAÁ-den, 33 Egıpetten, 5 Belarýsten, 7 Ýkraına, 7 Maldıvten, eki Ońtústik Koreıadan jáne bir jolaýshy Malı men Reseı», - dedi spıker.
Halyqaralyq jolaýshylar reısine keletin adamdardyń baılanyssyz termometrııasy Almaty halyqaralyq áýejaıynyń aýmaǵynda júrgiziledi.
Áýejaı qyzmetkerleri jeke qorǵanys quraldarymen qamtamasyz etilgen. Áýejaı aýmaǵynda mindetti maska rejımi jáne áleýmettik qashyqtyqty saqtaý talaptary bar.
Almaty qoǵamdyq densaýlyq saqtaý basqarmasy basshysynyń orynbasary Laýra Myrzaǵalı qala turǵyndary men qonaqtarynan megapolıs aýmaǵyna kelmes buryn PTR-test tapsyrýdy surady.
