Almaty áýejaıynda shetelden kelgen barlyq jolaýshy tekserýden ótip jatyr

ALMATY. QazAqparat – Almaty áýejaıynda baqylaý kúsheıtildi. Elge kelgen barlyq jolaýshyny arnaıy medıtsınalyq qurylǵymen tekserip jatyr, dep habarlaıdy QazAqparat tilshisi.

Almaty qalalyq Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Aıman Jaqanbaevanyń aıtýynsha, áýejaıda zamanaýı teplovızorlar bar.

«Bul qurylǵy eki jyl buryn ornatylǵan. Táýlik boıy jumys isteıdi. Ol dene qyzýy joǵary jolaýshylardy birden anyqtap esepke alady. Mundaı jaǵdaıda qurylǵy avtomatty túrde teplovızorǵa belgi beredi. Al biz planshet arqyly bilemiz », - dedi Aıman Jaqanbaeva.

Ol dene qyzýy joǵary jolaýshylardy dereý arnaıy bólmege jiberetinin atap ótti. Onda dárigerler ony tolyqtaı tekserip shyǵady, sodan keıin naýqasty aýrýhanaǵa jatqyzý nemese bosatý týraly sheshim qabyldanady. Ótken jyly dene qyzýy joǵary 38 jolaýshy anyqtalǵan.

Sapa jáne baqylaý departamentiniń sanıtarlyq-karantındi baqylaý bóliminiń bastyǵy Ryskúl Meıirmanovanyń aıtýynsha, Qytaıdaǵy jaǵdaıǵa baılanysty áýejaı kúsheıtilgen rejımde jumys istep jatyr.

«Jyl basynan beri Qytaıdan 7600 adam ushyp keldi. Bizden olarǵa 4 myńnan astam jolaýshy ushyp ketti. Reıster qysqartylǵan joq. Bári josparǵa saı júrip jatyr. Biz tek Qytaıdan ǵana emes, sonymen qatar basqa elderden ushyp kelgen barlyq jolaýshylarmen aldyn alý sharalaryn júrgizemiz», - dep tolyqtyrdy Ryskúl Meıirmanova.

Onyń aıtýynsha, temperatýrasy kóterilgen azamattar áýejaıda tirkelgen joq. Búgingi kúni jaǵdaı turaqty.