Almaty áýejaıynda sanıtarlyq normalar qalaı baqylanady
Almaty qalasy ákiminiń tapsyrmasy boıynsha megapolıs aýmaǵyndaǵy qoǵamdyq oryndarda sanıtarlyq-epıdemıologııalyq talaptardyń saqtalýy kún saıyn baqylanyp otyr. Olardyń qatarynda Almaty halyqaralyq áýejaıy da bar.
Megapolıs áýejaıynda jolaýshylar men qyzmetkerlerdiń qaýipsizdigin qamtamasyz etý úshin keshendi aldyn alý sharalary júzege asyryldy. Termınalǵa kirgen kezde dene temperatýrasyn mindetti túrde ólsheý júrgiziledi. Áýejaı qyzmetkerleri betperde rejımin jáne áleýmettik qashyqtyqty qatań baqylaıdy. Qoldy óńdeýge arnalǵan sanıtaızerler ornatylǵan. Árbir reısten keıin ǵımarattar men perrondyq avtobýstarǵa kúsheıtilgen dezınfektsııa júrgiziledi.
Kelýshilerdi habardar etý maqsatynda adamdar kóp jınalatyn jerlerde áleýmettik qashyqtyq belgileri kórsetilgen, kútý zalyndaǵy orydyqtar shahmattyq tártippen belgilengen.
Áýejaıda sanıtarlyq normalardyń saqtalýyn monıtorıngilik toptar baqylaıdy. QR Sybaılas jemqorlyqqa qarsy is-qımyl agenttigi janyndaǵy respýblıkalyq arnaıy monıtorıng toptyń jetekshisi Aıgúl Soloveva jáne QR Sybaılas jemqorlyqqa qarsy qyzmeti janyndaǵy respýblıkalyq arnaıy monıtorıng top tóraǵasynyń orynbasary Rafael Gasanov Almaty halyqaralyq áýejaıynda sanıtarlyq-epıdemıologııalyq sharalardyń saqtalýyna kezekti monıtorıng júrgizdi.
«Biz Almaty áýejaıy qoldanatyn barlyq algorıtmdi qadaǵaladyq. Birinshi kezekte, maska rejımi men sanıtarlyq normalardyń saqtalýyn tekserdik», - deıdi Aıgúl Soloveva.
Sonymen qatar, ol qala turǵyndary kóbirek jaýapkershilik tanytyp, sanaly túrde Qazaqstan aýmaǵyna qaıtyp kelgenge deıin aldyn ala PTR testileýden ótýi tıis ekenin tilge tıek etti.
Inspektsııalaý barysynda monıtorıng top músheleri halyqaralyq avıareısterge keletin jolaýshylardyń qozǵalys marshrýtymen tanysty.
Esterińizge sala keteıik, Bas memlekettik sanıtar dárigerdiń qaýlysyna sáıkes Qazaqstanǵa kelgenderdiń barlyǵynda PTR-koronavırýstyń joqtyǵy týraly anyqtama bolýy tıis, ol berilgen kúnnen bastap 3 táýlikten aspaýy kerek. Anyqtama bolmaǵan jaǵdaıda kelgen QR azamattary PTR ádisimen COVID-19 - ǵa zerthanalyq tekserý úshin karantındik statsıonarǵa 3 táýlikke deıin oqshaýlanýǵa jatady, al sheteldik azamattar deportatsııalanady.
«Biz Almaty qalasy boıynsha osyndaı monıtorıngti turaqty túrde júrgizip otyramyz. Biz áýejaıǵa baryp, koronavırýs ınfektsııanyń taralýyna jol bermeý úshin qala basshylyǵymen birlesip engizilgen jańalyqtarmen tanystyq»,- dedi Rafael Gasanov.
Aıta keter bolsaq, 9 aqpanda Almaty áýejaıyna 1 524 jolaýshysy bar 8 halyqaralyq áýe reısi keldi. Olardyń ishinde 1 303 jolaýshynyń anyqtamasy bar, 221 adamnyń anyqtamasy bolmaı shyqty.
