Almaty áýejaıynda sanıtarlyq-epıdemıologııalyq baqylaý kúsheıtildi
ALMATY. QazAqparat - Almaty áýejaıynda sanıtarlyq-epıdemıologııalyq baqylaý kúsheıtildi. Bul týraly Almaty qalasy Sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova onlaın brıfıng barysynda aıtty, dep habarlaıdy QazAqparat tilshisi.
«Qalanyń halyqaralyq áýejaıynda sanepıd baqylaýdy kúsheıtý boıynsha sharalar qabyldandy. QR Bas memlekettik sanıtarlyq dárigeriniń 12.04.2021 j. № 13 qaýlysyna sáıkes Qazaqstanǵa ushyp kelý kezinde PTR nátıjeleriniń bolýy mindetti. Máselen, anyqtamanyń joqtyǵynan 31 shetel azamaty deportatsııalandy»,-dedi Ásel Qalyqova.
Onyń aıtýynsha, Almatyda epıdemıologııalyq ahýal áli de kúrdeli. Aıta keterligi, qalalyqtardy COVID-19-ǵa qarsy jappaı vaktsınalaý qarqyndy júrýde.
«4 mamyrdaǵy jaǵdaı boıynsha ekpeni 226 258 adam aldy, onyń ishinde 4 878 polıtsııa qyzmetkeri, 18 210 pedagog, 24 391 dáriger. Egilgenderdiń jalpy sanyn 60 jastan asqan 30 256 adamdy quraıdy», -deıdi epıdemıolog.
Sonymen qatar, ol halyqty koronavırýske qarsy ekpe alýǵa shaqyrdy.
«Almatylyqtaryń ekpe alǵandary jón, bul aǵzany koronavırýstyq ınfektsııanyń aýyr aǵymynan qorǵaýǵa, sondaı-aq megapolıste ujymdyq ımmýnıtetti qalyptastyrýǵa múmkindik beredi. Búgingi kúni medıtsınalyq uıymdarda, mektepterde, mádenıet, sport nysandarynda, bazarlarda jáne qalanyń SOO-da 211 egý pýnkti jumys isteıdi. Oǵan 1809 adamnan turatyn 402 egý brıgadasy jumyldyrylǵan,-dedi ol.
