Almaty áýejaıynda sanıtarlyq-epıdemıologııalyq baqylaý kúsheıtildi
ALMATY. QazAqparat – Almaty ákimi Baqytjan Saǵyntaevtyń tapsyrmasy boıynsha epıdemııaǵa qarsy rejımdi kúsheıtý jáne megapolısti shetelden koronavırýs ákelýden qosymsha qorǵaý boıynsha sharalar qabyldandy, dep habarlaıdy QazAqparat tilshisi.
QR Bas memlekettik sanıtarlyq dárigeriniń №54 qaýlysyn iske asyrý aıasynda qalanyń bas memlekettik sanıtar dárigeri Jandarbek Bekshın Almaty halyqaralyq áýejaıynda Qazaqstan Respýblıkasynyń Memlekettik shekarasynda sanıtarlyq-epıdemııalyq sharalardy qatańdatý jóninde qaýly qabyldady.
Osyǵan baılanysty Almaty ákiminiń orynbasary Erjan Babaqumarov qalanyń bas memlekettik sanıtar dárigeri J.Bekshınmen birlesip áýejaı aýmaǵynda halyqaralyq reısterdiń jolaýshylaryn qarsy alý boıynsha qyzmetterdi úılestirý jáne jedel ózara is-qımyl máseleleri boıynsha jumys keńesin ótkizdi.
Semınar-keńeske áýejaı ákimshiligi, shekara qyzmeti, qala men áýejaıdyń sanıtarlyq-epıdemııalyq qyzmetteri basshylyǵy, sondaı-aq áýe aılaǵynda sanıtarlyq-epıdemııalyq qaýipsizdik sharalaryn qamtamasyz etýge tartylǵan qalalyq qurylymdardyń ókilderi qatysty.
Jıyn barysynda PTR-test tapsyrmaǵan jolaýshylardy anyqtaý úshin ushaqqa otyrǵyzý jáne túsý sátinen bastap ýákiletti qurylymdardyń is-qımyl algorıtmi pysyqtalyp, nusqama júrgizildi.
Almaty halyqaralyq áýejaıynyń aýmaǵynda áýe reısterimen keletin jolaýshylarǵa baılanyssyz termometrııa júrgiziledi. Áýejaı qyzmetkerleri jeke qorǵanys quraldarymen qamtamasyz etilgen. Sondaı-aq mindetti maska rejımi jáne áleýmettik qashyqtyqty saqtaý talaby saqtalady.
Almaty ákimdiginiń tapsyrmasy boıynsha áýejaı ǵımaratynda ushyp shyǵatyn jolaýshylar úshin PTR-dıagnostıkaǵa lıtsenzııalanǵan synama alý pýnkti ashyldy.
Dene qyzýy joǵary nemese aýrý belgileri (jótel, entigý, tynys alýdyń qıyndaýy) bar adamdar Almaty qalasy áýejaıynyń oqshaýlaý ornyna ornalastyrylady nemese áýe kemesiniń bortynan jedel járdem kóligimen dıfferentsıaldy dıagnostıka men emdeý júrgizý úshin qalanyń ınfektsııalyq statsıonarlaryna tasymaldanatyn bolady.
Sondaı-aq, jumys toby qalaǵa PTR-testileýsiz keletin jolaýshylardy ýaqytsha ustaýǵa arnalǵan qonaq úılerdiń daıyndyǵyn tekserdi. Munda PTR-testen ótpegen adamdardyń ýaqytsha bolýy, oqshaýlaýdy qamtamasyz etý jáne sanıtarlyq-epıdemııalyq qaýipsizdiktiń ózge de talaptaryn saqtaý úshin qajetti jaǵdaılar jasalǵan.
QR Bas memlekettik dárigeriniń qaýlysyna sáıkes, Qazaqstan Respýblıkasynyń Memlekettik shekarasynan ótý kezinde ózge eldiń azamattary qoldarynda COVID-19-ǵa alynǵan testtiń nátıjesi 72 saǵattan aspaǵanyn kórsetetin anyqtama bolmaǵan jaǵdaıda, qalaǵa kirýlerine jol berilmeıdi.
Shetelden anyqtamasyz kelgen QR azamattary áýejaı aýmaǵynan PTR-testileýdi ótkizý úshin jáne nátıjelerdi kútý kezeńinde ýaqytsha megapolıstiń qonaq úılerine ornalastyrylady.
Óz kezeginde, buǵan deıin QR Infraqurylym jáne ındýstrııalyq damý mınıstrliginiń Azamattyq avıatsııa komıteti áýe kompanııalaryna PTR-testileýden ótkeni týraly anyqtama bolmaǵan jaǵdaıda Qazaqstan Respýblıkasynyń azamattary bolyp tabylmaıtyn jolaýshylardy bortqa jibermeýdi tapsyrǵan.
Almaty qalasynyń ákimdigi qala turǵyndary men qonaqtarynan osy talaptardy saqtaýdy jáne megapolıs aýmaǵyna kelgenge deıin PTR-testileýden ótýdi suraıdy.
