Almaty áýejaıynda oq-dári alyp ótpek bolǵan áıel ustaldy
ALMATY. QazAqparat - Almaty áýejaıynda patron alyp ushpaq bolǵan áıel ustaldy, dep habarlaıdy QazAqparat Almaty qalalyq sotynyń saıtyna silteme jasap.
Almaty qalasynyń Túrksib aýdandyq sotynda taýyp alǵan oq-dárini zańsyz saqtaǵany úshin A.-ǵa qatysty qylmystyq is qaraldy.
2018 jylǵy 31 mamyr kúni saǵat 13:00 shamasynda A. Almaty qalasynyń «Juldyz-1» yqsham aýdanyndaǵy «Balnur» sulýlyq salonynyń janynan jerden bir dana oq taýyp alyp, sómkesine salǵan. Sol kúni, saǵat 13:50 shamasynda A. Astana qalasyna ushý úshin áýejaıǵa keledi. Saǵat 14:15-de áýevokzal ǵımaratyndaǵy tekserý aımaǵynan ótý barysynda rentgen apparaty áıeldiń sómkesinde patron bar ekenin kórsetken.
Sarapshynyń qorytyndysy boıynsha, ol áskerı patron ekeni ári atýǵa jaramdy ekeni anyqtaldy.
Sóıtip, A. oq-dárini zańsyz ıemdenip, saqtap jáne tasymaldaǵan.
Sot otyrysynda sottalýshy A. óz kinásin moıyndap, ókinetinin aıtty.
Sot úkimimen A. Qazaqstan Respýblıksynyń Qylmystyq kodeksiniń 287-babynyń 3-bóligine sáıkes aıypty dep tanylyp, 1 jyl merzimge bas bostandyǵyn shekteý jazasy belgilendi.
Úkim zańdy kúshine endi.
