Almaty áýejaıynda Qytaı men Iran jolaýshylaryna arnalǵan jańa tranzıttik zal ashyldy

Jıynda Almatynyń qazirgi jaǵdaıy pysyqtalyp, álem boıynsha koronavırýs ınfektsııasyn juqtyrýshylar sanynyń kúrt ósýi eskerile otyryp qabyldanatyn sanıtarlyq-karantındik baqylaýdy kúsheıtý týraly sharalar barysy sóz etildi.
1 naýryzynan bastap Qazaqstannyń bas sanıtarlyq dárigeriniń Qazaqstandaǵy koronavırýs ınfektsııasynyń aldyn alý sharalaryn odan ári kúsheıtý týraly» qaýlysy kúshine endi. Osylaısha ózge elderdegi koronavırýstyń taralý deńgeıin eskerip, epıdemııaǵa qarsy is-sharalardy júrgizýdiń úsh jiktemesi anyqtaldy.
Birinshi sanatqa sáıkes QHR, Iranda 14 kúnge medıtsınalyq baqylaý arqyly arnaıy bólingen úı-jaılarǵa oqshaýlanady. Ol jerden shyǵarylǵannan keıin 10 kúnniń ishinde bastapqy medıtsınalyq-sanıtarlyq kómek uıymdarynyń baqylaýynda bolmaq. Al
Gonkong, Makao, Taıvan, Ońtústik Koreıa, Japonııa, Italııada kúndelikti medıtsınalyq qyzmetkerdiń baqylaýynda ári 10 kún boıy úıinde karantınge jabylady.
2 sanat – Sıngapýr, Taıland, Ázerbaıjanda – 14 kún boıy medıtsına qyzmetkeriniń baqylaýynda bolyp, sodan keıin 10 kún qońyraý shalý arqyly qadaǵalaýǵa alynady.
3 sanat – Germanııa, AQSh, BAÁ, Ulybrıtanııa, Frantsııa, Bahreın, Kýveıt, Ispanııa, Malaızııa – QR shekarasyn kesip ótken kúnnen bastap 24 kún boıy qońyraý shalý arqyly medıtsına qyzmetkeriniń baqylaýyna alynady.
Búginde Almatydaǵy barlyq emhanalarda oqshaýlaǵysh, provızorlyq tósekter daıyn. Súzgilerdiń jumysy qalypty, respıratorlar men vırýstan qorǵaıtyn basqa da quraldar sany jetkilikti. Koronavırýstyq ınfektsııaǵa kúdikti adamdardy jedel tekserý júrgiziledi. Qosymsha tósek-oryndar uıymdastyrý boıynsha sharalar qabyldanýda.
«Qalanyń medıtsınalyq uıymdary koronavırýstyq ınfektsııanyń taralýyna jol bermeý úshin óziniń fýnktsıonaldyq mindetterin oryndaýǵa daıyn. Qalanyń medıtsınalyq kadrlarymen daıyndyq jumystary júrgizildi. Medıtsına qyzmetkerleri koronavırýstyq ınfektsııanyń taralýyna jol bermeý úshin is-sharalardy júzege asyrýǵa tolyq daıyn», – dedi Almaty qalasy Qoǵamdyq densaýlyq basqarmasynyń basshysy Tileýhan Ábildaev.
Megapolıstegi barlyq kólik baǵyttary da baqylaýǵa alyndy. Halyqaralyq áýejaı aýmaǵynda profılaktıkalyq jáne epıdemııaǵa qarsy is-sharalardy ótkizýge erekshe kóńil bólinedi. Koronavırýstyq ınfektsııa jaǵdaılary tirkelgen elderden kelgen barlyq adamdar epıdemıologtardyń baqylaýyna alyndy.
Almatyǵa 6 aqpannan bastap 13 myńnan astam jolaýshy keldi. 35-ke jýyq epıdemıolog qalaǵa kelgen barlyq reısterdi tekserdi.
«Kelgen adamdarǵa biz turaqty medıtsınalyq baqylaý júrgizemiz», – dedi qalalyq Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaǵasymova.
Almaty qalasynyń áýejaıynda qosymsha 1 sanattaǵy jolaýshylarǵa arnalǵan jańa tranzıttik zal ashyldy.
Otyrys qorytyndysy boıynsha óńirlik shtab tóraǵasy E. Babaqumarov barlyq memlekettik mekemelerge, onyń ishinde mektepterge, joǵary oqý oryndaryna jalpyǵa ortaq paıdalanýǵa qoljetimdi antıseptıkalyq jáne dezınfektsııalyq quraldardyń bolýyna baqylaýdy kúsheıtýdi tapsyrdy. Vırýstardan qorǵaıtyn quraldar adamdar kóp shoǵyrlanatyn jerlerge de qoıylýy tıis. Tıisti usynym hattar saýda ortalyqtarynyń, HQKO jáne t.b. ákimshilikterine jiberildi.
Budan basqa turǵyndar arasynda da vırýstyń aldyn alýyn qamtamasyz etý sharalary týraly aqparattyq-túsindirý jumystaryn kúsheıtý kerektigi júkteldi.