Almaty áýejaıynda qutqarýshylar arnaıy jattyǵýlar ótkizdi (FOTO)
ASTANA. QazAqparat - Almatyda «KAZEMERCOM» Qurama izdeý-qutqarý jasaǵynyń qutqarýshylary 1-3 sáýir aralyǵynda BUU gýmanıtarlyq máselelerin úılestirýdi basqarý ádisnamasy boıynsha halyqaralyq attestattaý daıyndyǵynyń jattyǵýlaryn ótkizdi. Bul týrady QR ІІM TJ boıynsha Komıtetiniń baspasóz qyzmetinen habarlady.
Jattyǵýlardyń birinshi kezeńinde respýblıkalyq jedel-qutqarý jasaǵynyń bazasynda mobılızatsııalaý jasaǵy qutqarýshylarynyń jeke quramyn habarlandyrý jáne medıtsınalyq qaraýdan ótý, izshil ıtterdi baqylaý, Almaty qalasynyń halyqaralyq áýejaıyna jetkizý úshin qutqarý jabdyqtaryn tıeý sııaqty tájirıbeler júrgizildi.
Almatydaǵy halyqaralyq áýejaıdyń aýmaǵynda ótken ekinshi kezeńde «KAZEMERCOM» jasaǵynyń qutqarýshylary qajetti qujattamany rásimdeýmen shekaralyq jáne kedendik protsedýralardan ótý áreketterin, sondaı-aq jeke quramnyń tótenshe jaǵdaı aımaǵyna jetkizý úshin jabdyqtar men kólik tehnıkasyn ushaqqa (Il-76) tıeý áreketteri jasaldy. Jattyǵý barysynda bólimshelerdiń jetekshileri jáne jasaqtyń jeke quramymen daıyndyq, mobılızatsııalaý jáne demobılızatsııalaý, izdeý-qutqarý jumystaryn ótkizý, sondaı-aq baılanysty uıymdastyrý, materıaldyq-tehnıkalyq jabdyqtaý, qaýipsizdik, densaýlyqty saqtaý jáne medıtsınalyq birge erip júrýdi qamtamasyz etý, qaýipsizdikti saqtaý máseleleri boıynsha brıfıng ótkizildi.
