Almaty áýejaıynda koronavırýstyń aldyn alýǵa arnalǵan oqý-jattyǵý ótip jatyr
ALMATY. QazAqparat - Halyqaralyq Almaty áýejaıynda Qytaı men álemniń basqa elderindegi epıdemııalyq jaǵdaılarǵa baılanysty jattyǵý ótip jatyr, dep habarlaıdy QazAqparat tilshisi.
Bul jattyǵýlardy Almaty qalalyq taýarlar men qyzmetterdiń sapasy men qaýipsizdigin baqylaý departamenti uıymdastyrdy.
Stsenarıı boıynsha, ushaqtyń bortserigi jolaýshylardyń birinen koronavırýs belgilerin baıqaıdy.
Áreket algorıtmi 10: 57-de bastalady. Dıspetcherge «Scat» áýekompanııasynan jolaýshy Lı ıÝn Tssıýdyń jótelip, dene qyzýy kóterilip jáne jaǵdaıynyń nasharlaǵany týraly aqparat túsedi.
«Jolaýshymen áńgimelesý barysynda bortserik onyń Ýhan provıntsııasynda turatynyn anyqtaıdy. Ol Almatyǵa qonaqqa ushyp kele jatqan. Naýqas bortserikke ushar aldynda basy aýyryp, jótelip, qaltyraǵanyn aıtady. Naýqastyń koronavırýstyq ınfektsııa shyqqan elde turatynyn jáne aýrýdyń klınıkalyq belgilerin salystyrǵan bortserigi qaýipti ınfektsııany juqtyrdy dep kúdiktenedi. Stsenarııdiń jelisi osylaı»,- deıdi Almaty qalalyq taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Gúlaıym Ismaǵulova.
Sodan keıin, áýe kemesinde ekıpajdyń kómegimen alǵashqy sanıtarlyq jáne epıdemııaǵa qarsy sharalar uıymdastyrylady. Eskertý shemasy men áreket algorıtmine sáıkes ınfektsııalyq aýrýlardy anyqtaý boıynsha tıisti sharalar qabyldanady.
Aıta ketý kerek, jattyǵý sharasyna áýejaı qyzmetteri, Almaty qalalyq taýarlar men qyzmetterdiń sapasy men qaýipsizdigin baqylaý, kólik departamentiniń mamandary, karantındik juqpaly ınfektsııalar ǵylymı ortalyǵy, áýejaıdyń medıtsınalyq qyzmeti, Almaty qalalyq qoǵamdyq densaýlyq saqtaý basqarmasy, jedel járdem brıgadasy men zalalsyzdandyrý ortalyǵynyń mamandary jumyldyryldy.
Jattyǵý barysynda Ulttyq ǵylymı ortalyǵynyń koronavırýstyq ınfektsııa týraly qysqasha tanystyrylymy bolady.
Eske salaıyq, 23 qańtar kúngi jaǵdaı boıynsha, 29 provıntsııada (aýdan, qalalar) jańa koronavırýsty barlyǵy 830 adam juqtyrǵany rastalyp, ólimmen aıaqtalǵan 25 oqıǵa tirkeldi.
