Almaty áýejaıynda koronavırýsqa qarsy is-sharalardyń oryndalýy tekserildi
NUR-SULTAN. QazAqparat - Almatyda aımaqtyq shtab megapolıs áýejaıynda koronavırýsqa qarsy is-qımyl sharalaryn júzege asyrý boıynsha tekserý jumystaryn júrgizdi, dep habarlaıdy QazAqparat.
Koronavırýstyq ınfektsııanyń taralýyn boldyrmaý jónindegi is-sharalardy júzege asyrý aıasynda Almaty qalasy ákiminiń orynbasary Erjan Babaqumarovtyń tóraǵalyǵymen aımaqtyq shtab otyrysy ótti.
Qoǵamdyq densaýlyq saqtaý basqarmasynyń bastyǵy T.Ábildaev jáne Almaty qalasy taýarlar men qyzmetterdiń sapasy men qaýipsizdigi departamentiniń bastyǵy A.Moldaǵasımova, «Halyqaralyq Almaty áýejaıy» AQ-nyń tasymaldaý jónindegi vıtse-prezıdenti B.Ábdirasilov, Almaty qalasynyń shekara baqylaý otrıady basshysynyń birinshi orynbasary A.Ýshpaev kúsheıtilgen sanıtarlyq-karantındik baqylaýdy qamtamasyz etý boıynsha júrgizilip jatqan jumystar týraly baıandady.
Sonymen qatar, sanıtarlyq-karantındik baqylaý úshin Almaty qalasynyń halyqaralyq áýejaıyna sapar jasaldy.
Áýejaıǵa barǵan kezde qaýipti aımaqtardan keletin ushaqtardyń súzgiden ótkizý aýmaǵyndaǵy jumysy, medıtsınalyq pýnkt jáne jylý túsirgishter tekserildi. Áýejaı qyzmetkerleriniń, kóshi-qon polıtsııasynyń, qaýipti aımaqtardan kelgen qonaqtarmen jumys erejeleriniń saqtalýyn qadaǵalaıtyn medıtsına qyzmetkerleriniń jumysyna erekshe kóńil bólinedi.
Halyqaralyq Almaty áýejaıy týrıstik jáne kóshi-qon aǵyndaryn eskere otyryp, zamanaýı talaptarǵa saı jabdyqtalǵan. Koronavırýstyq ınfektsııanyń taralýynyń aldyn alý, kóliktik baqylaý beketterinde sanıtarlyq-aǵartý jáne túsindirý jumystary boıynsha erejeler saqtalǵan.
Búgingi tańda reıster oqshaý turǵan turaqqa kelip toqtaıdy. Barlyq jolaýshy men ekıpaj músheleri eki ret jylý túsirgishter tekserisinen ótip, ary qaraı baqylaýda bolý úshin jáne tekseristen ótý úshin saýalnama toltyrady.
Vırýsty ınfektsııaǵa kúdiktelgen jolaýshylar dereý arnaıy oqshaýlanǵan aýmaqqa aparylady. Infektsıonıst bári durys ekenin málimdegen jaǵdaıda jeke baǵyt boıynsha arnaıy jabdyqtalǵan orynǵa jiberiledi.
Jalpy alǵanda búginde Almatydaǵy jaǵdaı baqylaýǵa alynǵan jáne koronavırýsty ınfektsııa juqtyrǵan jaǵdaı bolǵan joq. Bılik resmı aqparatqa senýge, áleýmettik jelilerdegi alyp-qashpa áńgimelerge kóńil aýdarmaýǵa shaqyrady.
