Almaty áýejaıynda Kıprdyń Interpol ortalyq bıýrosy halyqaralyq izdeýinde júrgen Reseı azamaty quryqtaldy - ІІM
ASTANA. 29 maýsym. QazAqparat /Jasulan Amanbaıuly/ - Almaty áýejaıynda Kıprdyń Interpol ortalyq bıýrosy halyqaralyq izdeýinde júrgen Reseı azamaty Sergeı Logınov quryqtaldy. Bul týraly búgin Astanada Іshki ister mınıstrliginde bolǵan baspasóz máslıhatynda Memlekettik til jáne aqparat departamenti bastyǵynyń orynbasary K. Temirova málim etti.
Ol ótken aptada Almaty áýejaıynda memlekettik shekaradan ótpek bolǵan tusynda ustaldy.
«Almatynyń krımınaldyq polıtsııa qyzmetkerleri qala áýejaıynda Máskeýden kelip memlekettik shekaradan ótpekshi bolǵan Reseı azamaty Sergeı Logınovty ustady. Oǵan Kıprdyń Interpol ortalyq bıýrosy halyqaralyq izdeý jarııalaǵan bolatyn», - deıdi K. Temirova.
ІІM-niń aqparaty boıynsha, Logınov 2008 jyldyń qarasha aıynda osy eldiń aýmaǵynda birneshe adammen birge Reseı azamatyn urlap, 1 mıllıon AQSh dollary kóleminde aqsha talap etken.
«2008 jyldyń jeltoqsanynda Logınovtyń sybaılastary ustalǵan, alaıda onyń ózi qashyp ketken bolatyn. Qazirgi ýaqytta kúdikti ýaqytsha ustaý ızolıatoryna qamaýǵa alyndy. Ony ekstradıtsııalaý máselesi sheshilýde»,-dep naqtylady K. Temirova.
