Almaty áýejaıynda izdeýde júrgen alaıaq áıel ustaldy
TALDYQORǴAN. QazAqparat - As iri kólemde alaıaqtyq jasady degen kúdikpen izdeýde bolǵan Qapshaǵaı qalasynyń turǵyny Almaty áýejaıynda qolǵa tústi, dep habarlaıdy Qazaqparat tilshisi.
Oblystyq ishki ister departamenti baspasóz qyzmetiniń habarlaýynsha, 50 jastaǵy áıel uzaq ýaqyt boıy qazaqstandyq tártip saqshylarynan Reseıde jasyrynyp júrgen. Polıtsııa ony Sankt-Peterbýrg qalasynan ushyp kelgen sátinde ustady.
Anyqtalǵandaı Qapshaǵaı qalalyq ishki ister bóliminiń qyzmetkerleri kúdiktini jyljymaıtyn múlikke qatysty alaıaqtyq jasaǵany úshin qylmystyq tergeý júrgizýde. Ol óziniń aldap-arbaý áreketterin 2014-2015 jyldary jasaǵan. Biraq resmı túrde áıelge 2017 jyly bir top jábir kórgenderdiń aryz shaǵymynan keıin izdeý salynady.
Qazirgi tańda qylmystyq iske jalpy somasy 4 mln teńge zalal keltirilgen Qapshaǵaı qalasynyń turǵyndarynan 7 aryz tirkelgen.
Jábirlenýshilerdiń aıtýynsha áıel óziniń satylymǵa qoıǵan páterine aldyn-ala tólem alyp otyrǵan. Biraq páter uzaq ýaqyttan beri bankte kepildik retinde tur. Sondaı-aq ol jábirlenýshilerdi memlekettik qyzmette tanystary bar ekenin alǵa tartyp, aqshalaı syıaqyǵa páter, jer telimderin alyp beremin dep aldap soqqan. Qapshaǵaı qalalyq sotynyń sheshimimen kúdikti qamaýǵa alyndy. Tártip saqshylary alaıaq áıelden jábir kórgender sanynyń artýy múmkin ekendigin aıtýda.
