Almaty áýejaıynda Italııadan ákelingen qoraptan qumyrsqalar tabyldy

ALMATY. QazAqparat - Almaty halyqaralyq áýejaıynda zańsyz ákelingen qumyrsqalar salynǵan konteıner tárkilendi, - dep habarlaıdy QazAqparat tilshisi.

Almaty halyqaralyq áýejaıynda memlekettik kirister departamentiniń «Jetisý» keden beketiniń qyzmetkerleri tekseris júrgizý barysynda Italııadan kelgen qorap ishinen kondıterlik ónimderdiń ornyna tiri jándikter, boljam boıynsha qumyrsqalar bar 7 probırka men 22 plastıkalyq konteıner anyqtady.
«Eýrazııalyq ekonomıkalyq komıssııa alqasynyń Syrtqy ekonomıkalyq qyzmettiń taýar nomenklatýrasy kody boıynsha jabaıy tiri jándikter Eýrazııalyq ekonomıkalyq odaqtyń kedendik aýmaǵyna ákelýge ruqsat berý tártibi belgilengen taýarlar tizbesine kiredi. Osylaısha, ruqsat qujattarynsyz tiri jándikterdi Qazaqstan Respýblıkasynyń aýmaǵyna zańsyz ákelý áreketi toqtatyldy», - delingen Memlekettik kirister departamentiniń habarlamasynda.
Atalǵan derek boıynsha materıaldar sheshim qabyldaý úshin ýákiletti memlekettik organǵa jiberildi.