Almaty áýejaıynda bir táýlikten asa ushaq kútken jolaýshylar búgin saparǵa shyǵady
ALMATY. QazAqparat - Almatyda Taılandqa usha almaı 1,5 táýlik boıy áýejaıda qańtarylǵan jolaýshylar Phýketke búgin túste ushatyn boldy, dep habarlaıdy QazAqparat tilshisi.
Scat áýe kompanııasynan habarlaǵandaı, jolaýshylardyń birazy keshe, ıaǵnı 14 aqpanda ushyp ketken.
Ekinshi legi búgin túste Taılandqa ushady. Jolaýshylardy basqa áýe kompanııasynyń ushaǵy jetkizedi.
«Keshe 22:00-de áýe kompanııasy Phýket qalasy áýejaıynan ushýǵa ruqsat surady. Ushý aldyndaǵy daıyndyq kezinde qosymsha tehnıkalyq jóndeý júmystary kerek ekendigi anyqtaldy. Kompanııa bul ushaqty basqa áýe kemesimen aýystyrý týraly sheshim qabyldady. Osylaısha 186 jolaýshy Phýketke 23:00-de ushyp ketti. 104 adam búgin 14:00-de ushatyn boldy. Áýe kompanııasy jolaýshylardan qolaısyz jaǵdaı úshin keshirim suraıdy. Qaýipsizdik bizdiń kompanııa úshin basty nazarda», - dedi áýe kompanııasy.
Áýe kompanııasynyń habarlaýynsha, keshe túnde jolǵa shyqqan ushaqqa bar joǵy 186 adam syıatyn bolǵandyqtan, olar jolaýshylardy eki kemege bólip otyrǵyzýǵa májbúr bolǵan.
Scat barlyq jolaýshylarǵa keltirilgen materıaldyq shyǵyndardy tolyq óteıtinin habarlaǵan bolatyn. Ol úshin bılet satyp alynǵan týragenttikke habarlasý kerek.
Aıta ketý kerek, Scat áýe kompanııasynyń Almaty-Phýket reısiniń jolaýshylary Almaty áýejaıynda 1,5 táýlikten asa ýaqyt qańtarylyp qalǵan edi. Biraz adam úıdi úıine qaıtyp, qalǵan 160 adam jaqyn aradaǵy qonaqúıge ornalastyryldy.
Reıs Phýket áýejaıynyń ushý-qoný jolaǵynyń jóndeýge jabylýyna baılanysty bógelip qaldy.
