Almaty áýejaıynda Ashyq mobıldi qosymshasy qalaı jumys isteıdi
Qazaqstannyń bas memlekettik sanıtarlyq dárigeri Erlan Qııasovtyń 6 mamyrdaǵy qaýlysyna sáıkes, jolaýshylar áýejaıǵa keler aldynda Ashyq mobıldi qosymshasyn júktep, mártebesin tekserýi kerek.
Bul rette áýejaı ǵımaratyna kirý úshin jolaýshy QR-kodty skanerlep, óz statýsyn áýejaı qyzmetkerine kireberiste kórsetýi tıis. Qosymsha, óz kezeginde, qyzyl, sary, kók jáne jasyl tústi kórsetedi.
Jolaýshylarǵa statýs «PTR-zertteýlerdiń biryńǵaı ıntegratsııalyq portaly» jáne «Qazaqstan Respýblıkasy Densaýlyq saqtaý mınıstrliginiń COVID-19 baqylaý ortalyǵy» aqparattyq júıelerimen salystyrý negizinde beriledi.
Statýs kelesideı:
«Jasyl» – júrip-turýynda shekteý joǵyn bildiredi, mundaı adam bazada COVID-19 indetine PTR-testileýi teris nátıje kórsetken paıdalanýshy bolyp sanalady.
«Kók» — aýrý juqtyrǵan adamdarmen baılanysta bolǵan adamdar esebinde joq, PTR-test talap etiletin jerlerden basqa kez kelgen orynda erkin qozǵalý degendi bildiredi.
«Sary» – baılanysta bolǵan adamdarǵa beriletin mártebe. Olarǵa azyq-túlik alýǵa nemese úıdiń janyndaǵy dárihanaǵa barýǵa ruqsat etilgenmen, basqa qoǵamdyq oryndarǵa barýyna tyıym salynady.
«Qyzyl» statýs — PTR-test tapsyryp, koronavırýs anyqtalǵan adamǵa beriledi. Mundaı mártebe ıeleri úıde oqshaýlaný rejımin qatań saqtaýy tıis.
«Ashyq» jobasynyń maqsaty – qyzyl jáne sary statýsy bar jolaýshylardy áýejaıǵa jáne ushaqqa kirýine shekteý qoıylý arqyly ózgelerdiń qaýipsizdigin qamtamasyz etý.
Áýejaıdyń baspasóz hatshysy Natalıa Sokolovanyń aıtýynsha, jolaýshylar, shyǵaryp salýshylar men qarsy alýshylar osy júıeniń kómegimen tekseriledi.
«16 mamyrdan bastap biz júıeni pılottyq rejımde iske qostyq. «Ashyq» jobasy boıynsha jumys isteýge daıynbyz. 16-19 mamyr aralyǵynda Tsıfrlyq damý mınıstrliginiń málimetteri boıynsha «qyzyl» mártebege ıe 24 jáne «sary» mártebege ıe 15 adam anyqtaldy. Olar áýejaıǵa jiberilgen joq «, - dep túsindirdi Natalıa Sokolova.
Sonymen qatar, ol jolaýshyda smartfon bolmaǵan jaǵdaıda áýejaı qyzmetkeri aqparattyq júıede JSN (onyń kelisimimen) arqyly onyń statýsyn tekseretinin aıtty.
«Smartfondary men telefony joq adamdar ýaıymdamasyn. Eń bastysy jeke kýáligi bolsa bolǵany. Kire beriste olardyń mártebesin qaýipsizdik qyzmetkeri tekserip beredi. Sheteldikter de dál solaı teksere alady. Al 18 jasqa deıingi balalar emin-erkin ótedi «, - dep qosty ol.
Sondaı-aq, spıker júıe isten shyqqanda qandaı sharalar qoldanatynyn aıtty.
«Jobany ázirleýshiler barlyq tehnıkalyq tustaryn da qarstyrǵan. Qazir júıe jaqsy jumys istep tur. Eshqandaı aqaýlar bolmaıdy dep senemiz. Júıe isten shyqqan jaǵdaıda biz jolaýshylardy jiberemiz, óıtkeni bul fors-major jaǵdaı. Biz óz tarapymyzdan jolaýshylardy uzaq kúttirmeý úshin qosymsha kireberister ashtyq, dálizder uıymdastyrdyq. Ashyq málimetter bazasynda kelýshilerdiń JSN-i jazylǵanyn jáne baǵdarlama jasaýshylar derekterdiń qaýipsizdigine kepildik beretindigin atap ótkim keledi «, - dedi spıker.
Qala turǵyndary pılottyq jobaǵa joǵary baǵa berip úlgerdi.
«Kire beriste mende « kók « mártebesi shyqty. Biraq men vaktsınany bazaǵa qosýyn kútip júrmin. Sebebi, biz otbasymzben vaktsına saldyrdyq. Meniń oıymsha, bul jobany júzege asyrǵany jaqsy, óıtkeni kásipkerlerge jumys isteýge ruqsat berilgen», - dep oıymen bólisti almatylyq.
