Almaty áýejaıynda alty Sırııa azamaty jalǵan qujatpen ustaldy
ASTANA. QazAqparat - «Almaty» shekara baqylaýy bólimshesiniń jasaǵy «Tegeran - Almaty» baǵytyndaǵy reısten Sırııa Arab Respýblıkasynyń alty azamatyn ustady. Olar tekserýge Bolgarııa Respýblıkasy azamattarynyń tólqujattaryn usynǵan, dep habarlaıdy «QazAqparat» HAA tilshisi QR UQK shekara qyzmetine silteme jasap.
«Ustalǵandardyń aıtýynsha, olar Qazaqstan Respýblıkasynyń aýmaǵyn Eýroodaq elderine shyǵý maqsatynda tranzıt retinde paıdalanbaqshy bolǵan», - delingen QR UQK ShQ baspasóz qyzmetiniń habarlamasynda.
Ustalǵandar týraly quqyq qorǵaý organdary men ózara áreket etýshi organdar ókilderine habarlandy.
Aıta keteıik, keshe «Astana» shekara baqylaýy bólimshesiniń qyzmetkerleri Astana-London reısinde tekserýge Bolgarııa azamatynyń qujatyn tapsyrǵan sırııalyq eki azamatty anyqtady.
