Almaty áýejaıynan jańa halyqaralyq reıster ashylady
ALMATY. QazAqparat – Almaty halyqaralyq áýejaıynda halyqaralyq reısterdiń sany 67-ge deıin ósedi. Bul týraly óńirlik kommýnıkatsııalar qyzmeti alańynda áýejaı prezıdenti Alyp Er Tońǵa Ersoı aıtty, dep habarlaıdy QazAqparat tilshisi.
Spıkerdiń málimetinshe, Almaty áýejaıy ótken jyly 7,2 mln-nan astam jolaýshyny qarsy alǵan.
«Ótken jyly 64 697 reıs jasaldy, bıyl 8 mln-nan astam jolaýshy, 70 myńnan astam áýe reısi, 94 myń tonna Kargo reısi ushady dep kútilip otyr», - dedi áýejaı basshysy.
Ol sondaı-aq bıyl reıster sany 67-ge deıin artatynyn aıtty.
«Biz Ashhabad, Erevan, Karachı, Kýtaısı, Lahor, Maskat, Kaırol jáne Sıamǵa jańa reıster ashylady dep kútip otyrmyz», – deıdi spıker.
Ol sondaı-aq áýejaıǵa kelýshiler arasynda eń tanymal baǵyttardy atady.
Alyp Er Tońǵa Ersoıdyń aıtýynsha, halyqaralyq reıster arasynda TOP-5 baǵytqa - Ystanbul, Dýbaı, Antalııa, Máskeý, Tashkent, al ishki reıster arasynda - Astana, Shymkent, Aqtaý, Atyraý, Aqtóbe qalalary kiredi.
