Almaty áýejaıyna jarylǵysh jáne esirtki zattardy anyqtaýǵa arnalǵan jańa zamanaýı qurylǵy qoıyldy
ALMATY. 25 naýryz. QazAqparat /Názıra Eleýhan/ - Búgin Almaty halyqaralyq áýejaıynda, Almaty qalasy boıynsha Kedendik baqylaý departamentiniń «Jetisý» keden beketiniń qyzmet etý aımaǵynda
jańa qurylǵy - jarylǵysh jáne esirtki zattardy anyqtaýǵa arnalǵan «Ionscan sentinell II» túıispeıtin ótpeli portal iske qosyldy.
Kedendik baqylaý departamentiniń baspasóz qyzmetiniń jetekshisi Erlan Qalymǵazınniń aıtýynsha, ótken jyly elimizdiń keden organdary Elbasymyzdyń Qazaqstan halqyna Joldaýynda qoıylǵan mindetterin júzege asyrýǵa basty nazar aýdarǵan. «Negizgi kúsh zańnamalyq jáne normatıvtik bazany nyǵaıtýǵa, kedendik baqylaýdy jetildirýge, zamanaýı aqparattyq jáne kommýnıkatsııalyq tehnologııalardy engizýge, kedendik ınfraqurylymdy jańartýǵa baǵyttaldy. Oǵan jaqynda ashylǵan aımaqtyq monıtorıng ortalyǵy men búgin tusaýy kesilgen zamanaýı qurylǵy dálel bola alady», - dedi ol.
Onyń aıtýynsha, endi tek osy jańa qurylǵy - «Ionscan sentinell II» portaly adamdardy basynan aıaǵyna deıin janasýsyz tekserip, jarylǵysh jáne esirtki zattardyń bar-joǵyn anyqtaıtyn bolady. "Ony arnaıy jumys isteıtin operator túrli-tústi ekran arqyly basqarady. Qurylǵynyń artyqshylyǵy - ol kóp ýaqyt izdeýlerge ketetin is-áreket ýaqytyn qysqartyp, birneshe sekýnd ishinde atalmysh zattardyń bar-joǵyn anyqtaı alady. Qurylǵy bir mınýt ishinde 6 adamdy tekserip qaraı alady", - dep atap ótti Erlan Qalymǵazın.
