Almaty áýejaıy jolaýshylaryna qymbat tamaqtyń ornyna balamaly tańdaý usyndy
ASTANA. QazAqparat - Almaty áýejaıy jolaýshylaryna qymbat taǵamdardyń ornyna balamaly tańdaý usynylýda. Bul týraly búgin Astanada áýejaı máselelerine arnalǵan IATA konferentsııasynda Almaty qalasy Týrızm basqarmasy basshysynyń mindetin atqarýshy Tımýr Dúısenǵalıev málim etti.
Onyń sózine qaraǵanda, áýejaıda baǵasy tómendetilgen taǵamdarmen vendıng-apparattar ornatylýda. «Jaqynda baǵa boıynsha pikir almasý boldy. Áýejaı basshylyǵy osy problemaǵa túsinistikpen qarap otyr. Osy oraıda vendıng-apparattardy ornatý bastaldy, bul adamdardyń kútý aımaǵynda satyp alatyn azyq-túlik ónimderi baǵasyn tómendetýge múmkindik beredi. Dál sol taǵamdy jaqyn jerden 5-6 ese arzan baǵaǵa satyp alýǵa bolady. Meniń oıymsha, adamdar osyndaı qadamdy durys túsinedi jáne bul másele sheshimin tabady», - dedi ol. Tilshilerge bergen suhbatynda ol Almaty áýejaıyndaǵy tamaqtaný oryndarynda joǵary baǵa máselesin sheshý qıyndaý ekenin aıtqan bolatyn. «Buǵan obektıvti jaǵdaılar yqpal etýde. Áýejaıda tamaqtaný oryndarynda birneshe ıe bar. Qoǵamdyq tamaqtaný oryndarynyń ıeleri qoıǵan baǵany áýejaı basshylyǵy retteı almaıdy», - dedi T.Dúısenǵalıev.
