Almaty áýejaıy zaqymdanǵan ushaqty saqtandyrý esebinen jóndeıtin boldy
ALMATY. QazAqparat - Almaty halyqaralyq áýejaıy zaqymdanǵan ushaqty jóndeýge qyrýar qarjy qajet ekendigi týraly BAQ-ta jarııalanǵan maqalaǵa qatysty túsinikteme berdi, dep habarlaıdy QazAqparat tilshisi.
Maqalada Hawker 900XP ushaǵy qanatynyń vıngleti zaqymdanǵanyn, endi ony jóndeýge kóp qarjy qajet ekenin ári ol úshin ushaqty shetelge áketý kerektigin jazǵan edi.
Halyqaralyq Almaty áýejaıy atalǵan maqalaǵa túsinikteme berdi.
«2019 jyldyń 1 qańtarynda qar tazalaýshy mashına antennalarymen turaqta turǵan ushaqtyń qanatynyń ushyn qaǵyp ketti.Sonyń saldarynan ushaqtyń qanaty zaqymdanyp, syry ushyp ketti. Bul oqys oqıǵa jaıly QR IDM Azamattyq avıatsııa komıtetine habarlandy. Avıatsııalyq oqıǵalardy zertteý erejesine sáıkes bul jaǵdaı shuǵyl oqıǵaǵa jatpaıdy. Ushaq paıdalanýda bolmaǵan, turaqta jabyq kúıinde turdy. Bortta adamdar bolmady, syrttaǵy adamdarǵa qaýip tónbedi. Erejeniń №6 tarmaǵyna sáıkes mundaı oqıǵa tekserýdi qajet etpeıdi», - delingen áýejaıdyń resmı jaýabynda.
Qazir áýejaı basshylyǵy «Fly Jet» JShS-men (ushaq senimdi basqarýǵa berilgen) birlese otyryp qyzmettik tekserý júrgizgen.
Qar tazalaý kóliginiń júrgizýshisi tártiptik jazaǵa tartyldy.
«Avtordyń «ushaqty jóndetýge shetelge áketý kerek» degeni de shyndyqqa janaspaıdy. Tehnıkalyq qujattardy alǵan soń sertıfıkaty bar mamandar ushaqty áýejaıdyń aýmaǵynda jóndeıtin bolady. Ushaqtyń tehnıkalyq jaǵdaıy saqtandyrylǵan. Jóndeý jumystary saqtandyrý qorynan qarjylandyrylady. «Jóndeýden soń ushaq usha almaıdy» degen múlde qate pikir», - dedi baspsóz qyzmetinen.
