Almaty áýejaıy termınalynyń qashan jańǵyrtylatyndyǵy belgili boldy
ALMATY. QazAqparat - Almaty halyqaralyq áýejaıy jolaýshylardy ótkizý qabiletin arttyrý maqsatynda termınaldy keńeıtpek, dep habarlaıdy QazAqparat tilshisi.
«Áýejaıdyń habarlaýynsha, jolaýshylar termınalynyń alańyn keńeıtý josparlanyp otyr. Bul oraıda termınal saǵatyna 1600 emes, 4200 jolaýshyǵa deıin qabyldaı alady», - dedi QazAqparat saýalyna berilgen QR IIM Azamattyq avıatsııa komıtetiniń resmı jaýabynda.
Búginde atalǵan joba boıynsha jobalyq qujattama jasalyp jatyr. Bul jumys 2020 jyly bastalady. Oǵan 40 mlrd teńge kóleminde ınvestıtsııa salynady.
Rekonstrýktsııadan soń termınal kólemi taǵy 40 myń sharshy metrge ulǵaıady.
Al avtokólik turaǵyn 2 myń orynǵa jetkizý josparda bar.
«Jobalyq-smetalyq qujattamany jasaýdy 2019 jyldan bastaımyz. Al qurylys -montaj jumystary 2020-2021 jyldary bastalady», - dedi halyqaralyq áýejaıdan.
Budan buryn Almaty ákiminiń orynbasary Erlan Áýkenov Almaty halyqaralyq áýejaıynyń aýmaǵy eki ese ulǵaıatynyn aıtqan edi.
