Almaty áýejaıy men vokzal keshenderinde profılaktıkalyq sharalar kúsheıtildi
ALMATY. QazAqparat – Almatyda áýejaı men vokzal keshenderinde koronavırýs juqpasynyń aldyn alý boıynsha profılaktıkalyq sharalar kúsheıtile tústi, dep habarlaıdy QazAqparat tilshisi.
QR DSM jergilikti organdarmen birige otyryp saqtyq sharalaryn kúsheıtti.
«Eń aldymen syrttan kelgen jolaýshylar legi ásirese QHR, Reseı jáne basqa jaqtan kelgen jolaýshylar úshin koronavırýstyń aldyn alýǵa qatysty maǵlumat beretin beınerolıkterdi kórsetip jatyrmyz. LED ekrandar ornalasqan vokzal jáne áýejaılarda beınerolık belgili bir ýaqyt saıyn qaıtalanyp turady. Sondaı-aq, jolaýshylarǵa eskertý paraqshasy taratylyp jatyr. Bul jadnamalarda juqpanyń sımptomdary jazylǵan. Dene qyzýy kóterilgen jaǵdaıda qaıda habarlasý kerek, ne isteý kerektigi túgel kórsetilgen. Ár vokzal, áýejaıda QR DSM ókilderi jumys istep jatyr. Sonymen qatar, bul nysandarda dybystyq habarlama 4 tilde: qazaq, orys, qytaı, aǵylshyn tilinde taratylyp jatyr. Ár nysandarda teplovızorlar ornalasqan. Bul arqyly jolaýshylardyń dene qyzýyn baqylaýǵa bolady», - dedi QR DSM baspasóz qyzmetinen.
Mınıstrlik ókilderiniń aıtýynsha, kún saıyn ár áýejaı, vokzal keshenderinde oqý-jattyǵý sharalary ótkizilip turady.
«Qaladaǵy áýejaı, vokzal keshenderi qaýipti indettiń aldyn alýǵa ázir. Syrttan kelgen jolaýshylar tekseriledi. Dene qyzýy baıqalǵan jolaýshylarda qaýip joq bolsa, tirkelgen mekenjaıy boıynsha dárigerler baryp baqylap turady. Qazirgi tańda jolaýshylar arasynda da, ekıpaj, júrgizýshiler arasynda da kúdik týǵyzǵan adam joq», - dedi QR DSM baspasóz qyzmetinen.
