Almaty áýejaıy Qytaıdan kelgen barlyq jolaýshyny karantınge jatqyzatyn boldy

ALMATY. QazAqparat – Almaty áýejaıy birinshi sanattaǵy, ıaǵnı Qytaı Halyq Respýblıkasynan kelgen jolaýshylardyń barlyǵyn karantınge jatqyzatyn boldy, dep habarlaıdy QazAqparat tilshisi.

Bul týraly áýejaıdyń áleýmetitk jelidegi resmı paraqshasynda jarııalandy.

«Qurmetti jolaýshylar, búginnen bastap bas memlekettik sanıtarlyq dárigerdiń qaýlysyna sáıkes elde koronavırýsqa qarsy kúres sharalary kúsheıtilip jatyr. Atap aıtqanda, Almaty áýejaıy arqyly ótetin birinshi sanattaǵy jolaýshylar birden karantınge jabylatyn boldy. Qaýlyǵa sáıkes, 20 aqpannan bastap koronavırýs juqpasy shyqqan elderden keletin jolaýshylar úsh sanatqa bólingen edi. Birinshi sanatqa jatqyzylǵan QHR-dan kelgen jolaýshylar endi 14 kúnge statsıonarlyq karantınge jabylatyn boldy. Odan keıin 10 kúndeı medıtsına mamandarynyń baqylaýynda bolady. Ekinshi sanatqa jatatyn koronavırýs juqpasynyń 10 jaǵdaıy tirkelgen elden kelgen jolaýshylar úı jaǵdaıyndaǵy karantınde 14 kún jatýy tıis», - dep jazylǵan Almaty áýejaıynyń resmı paraqshasynda.

Aıta keteıik, qaýipti vırýsty juqtyrǵan adam sany 10-nan aspaıtyn elden kelgen jolaýshylar úıde 24 kún baqylaýda bolýǵa mindetteledi.