Almaty áýejaıy basshylyǵy: Termınaldyń ótkizý qabiletin arttyrýdyń birneshe joly bar
ALMATY. QazAqparat - Almaty halyqaralyq áýejaıynyń basshylyǵy termınaldyń ótkizý múmkindigin arttyrý qajettigin málimdedi, dep habarlaıdy QazAqparat tilshisi.
«Qazirgi termınal saǵatyna 1600 jolaýshyny ótkize alady. Onyń, jergilikti áýe joldary pavılonyn qosqandaǵy aýmaǵy 23 myń 700 sharshy metr. Qaýyrt kezde bul jetkiliksiz, sońǵy bir-eki jylda biz osy rejımde jumys istep jatyrmyz», - deıdi Almaty áýejaıynyń vıtse-prezıdenti Aleksandr Gordeev.
Onyń aıtýynsha, áýejaıdyń sterıldik aımaǵy nebári 850 sharshy metrdi quraıdy.
«Termınaldyń ótkizý qabiletin arttyrýdyń birneshe kontseptsııasy bar. Aldaǵy bir-eki jylda másele sheshimin tabady. Utymdy sheshimderdi izdep jatyrmyz, bul ońaı sharýa emes. Atap aıtqanda, termınaldyń aýmaǵyn eski VIP ǵımaraty jaqqa qaraı ulǵaıtýdy da qarastyrdyq, biraq ǵımarat jergilikti mańyzǵa ıe sáýlet eskertkishteri tizilimine kirgizilgendikten, bul rette qıyndyq týyndaıdy. Basqa kontseptsııalar da bar, olar týraly, áýejaıdyń ótkizý qabiletin arttyrýǵa qatysty birer naqty sheshim qabyldanǵan soń málim etemiz», - deıdi ol.
