Almaty áýejaıy áýe qaýipsizdigin qamtamasyz etý tarıfterin 146,7%-ǵa arttyrýdy usyndy
ALMATY. QazAqparat - Almaty áýejaıy áýe qaýipsizdigin qamtamasyz etý tarıfterin 146,7%-ǵa arttyrýdy usyndy, dep habarlaıdy QazAqparat tilshisi.
QR IDM azamattyq avıatsııa komıtetinde Almaty áýejaıynyń qaýipsizdik tarıfterin kóterý jóninde qoǵamdyq tyńdaý ótti.
AAK baspasóz qyzmeti habarlaǵandaı, «Almaty halyqaralyq áýejaıy» AQ aldaǵy 5 jylda áýejaıdaǵy qaýipsizdik tarıfteriniń (maksımaldy ushý massasynyń) tonnasyn 292,59 teńgege kóterý týraly jobany tanystyrdy.
Qazirgi tańda áýejaıda bul kórsetkish MUM tonnasy 118,60 teńge bolyp otyr. Sońǵy ret bul shekti deńgeı 2010 jyly bekitilgen.
Mamandardyń aıtýynsha, buǵan birneshe faktor áser etip otyr. Birinshiden, ınvestıtsııalyq baǵdarlamany júzege asyrý, Qoǵamnyń naqty shyǵyndaryn azaıtý, 2010 jyldan bergi kórsetiletin qyzmet kóleminiń artýy yqpal etip otyr.
Qazirgi tańda bul ótinim Komıtetke ótkizildi. 24 qyrkúıekke deıin mamandar atalǵan usynysty jan-jaqty qarastyratyn bolady.
Aıta ketý kerek, 2017 jyldyń 1 qańtarynan aeronavıgatsııa men áýejaılar qyzmeti salasyndaǵy tabıǵı monopolııalardy retteý men baqylaý fýnktsııalary azamattyq avıatsııadaǵy quzyrly organǵa berildi.
