Almaty áýejaıy Astana áýejaıynyń ushaqtaryn ýaqytsha qabyldap jatyr
ALMATY. QazAqparat - Almaty áýejaıy búgingi aýa raıynyń qolaısyzdyǵyna baılanysty Astana ushaqtarynyń jartysyn qabyldap jatyr. Bul týraly QazAqparat tilshisine áýejaıdyń baspasóz qyzmeti habarlady.
Almatyda qazir qalyń qar jaýyp tur.
"Almaty Halyqaralyq áýejaıy" AQ basshysy Aıbol Bekmuhambetovtyń aıtýynsha, qazir áýejaı shtattyq rejimde jumys istep tur.
"Jaýyp jatqan qar áýejaı jumysyna esh kedergisin keltirip jatqan joq. Aýa temperatýrasy +3 gradýsty kórsetip tur. Beton jolaqqa túsken qar birden erip ketip jatyr. Shtattyq rejimde jumys jasap tur. Jaqynda ǵana ornatylǵan quraldar áýejaıda eń qıyn jaǵdaıda da ushaq qabyldaýǵa múmkindik beredi», - dedi Aıbol Bekmuhambetov.
Sonymen qatar, Almaty áýejaıy Astana ushaqtaryn zapastaǵy aerodrom retinde qabyldap jatyr.
«Astanada qatty jel soǵyp jatyr. Sondyqtan áýejaı ushaqtardy qabyldaı almaıdy. Qazir Astana ushaqtaryn zapastaǵy aerodrom retinde bizge jiberip jatyr», - dedi áýejaı basshysy.
