Almaty áýejaıy ana men bala bólmesiniń nege jupyny ekendigin túsindirdi
ALMATY. QazAqparat – Almaty áýejaıynyń basshylyǵy ana men bala bólmesi nege sonsha jupyny ekendigin túsindirýge tyrysty, dep habarlaıdy QazAqparat tilshisi.
Áýejaı basshylyǵy qyrǵyz azamaty Elmar Kımniń synı jazbasyna jaýap berdi.
Qyrǵyz azamaty Elmar Kım Almaty áýejaıyna 3 saǵatqa bógelip, reısterin kútken.
Ol jubaıymen birge ana men bala bólmesine kirip, balalaryn tynyqtyrmaq bolady.
Qyrǵyz azamaty ana men balaǵa arnalǵan bólmeniń ishin synap, basqa elderdegi osyndaı bólmelerimen salystyrǵan. Ol áýejaıdaǵy bólmeni sasyq kartserge teńedi
Jolaýshynyń Facebook-tegi synaǵan jazbasyna Almaty áýejaıy jaýap jazdy.
«Biz Elmar Kımniń synyn durys qabyldaımyz. Biraq osy úsh bólmeni jóndeý men jabdyqtaýdyń bıýdjeti 2 aı buryn bekitilgen bolatyn. Bizge qyzmet kórsetýshini anyqtaý úshin tender ótkizýge ýaqyt kerek boldy. Tusqaǵazdan bastap oıynshyqtar, jıhazǵa deıin, turmystyq tehnıkany jetkizýshilerdi anyqtaý kerek boldy. Búginde jańa ústel, kreslo, dıvan, jańa mıkrotolqyndy pesh, sýdy jylytatyn kýler satyp alýǵa kelisim jasaldy. Ana men bala bólmesinde jeke gıgıenalyq zattar tegin turatyn bolady. Barlyq jolaýshylarǵa keltirilgen qolaısyzdyqtar úshin keshirim suraımyz», - dedi áýejaı basshylyǵy.
Jóndeý jumystary 10 qyrkúıekte bastalady.
