Almaty áýejaıy 3 jyldan beri kemshilikterdi joımaı otyr – mınıstrlik

NUR-SULTAN. QazAqparat – Indýstrııa jáne ınfraqurylymdyq damý mınıstrligi kóliktegi oqıǵalar men ıntsıdentterdi tekserý departamentiniń dırektory Bolat Naýryzálıev Almaty áýejaıy 3 jyldan beri mamandar eskertken kemshilikterdi joımaı otyrǵanyn málim etti, dep habarlaıdy QazAqparat tilshisi.

«Bizdiń departament avıatsııalyq oqıǵalardyń sebepterin anyqtaıdy. Azamattyq avıatsııa halyqaralyq uıymynyń standarttary men usynymdary boıynsha esep ázirlendi. Júrgizilgen tergeý atalǵan esep boıynsha áldebireýdiń kinásin nemese jaýapkershiligin anyqtaýdy kózdemeıdi», - dedi departament basshysy.

Buǵan deıin jarııalanǵan tergeý esebine súıengen jýrnalıster bul oqıǵada áýejaı ákimshiliginiń kinási bar-joǵyn surady.

«Esepte bári aıqyn kórsetilgen. Áýejaı tarapyna qandaı eskertýimiz bar degenge kelsek, bizdiń tujyrymdar men usynymdar boıynsha avıatsııa ákimshiligi kórsetilgen kemshilikterdi joıý úshin áýejaıǵa shara qabyldaýy kerek. Biz bergen usynymdarda búkil kemshilikter men eskertýler kórsetilgen. Biz tek tergeýmen aınalysamyz, avıatsııalyq oqıǵalardyń sebepterin anyqtaımyz. Mundaı jaǵdaılar qaıtalanbas úshin usynym beremiz. Avıatsııa uıymy áýejaıǵa qatysty birneshe tekserý júrgizdi. Áýejaı úsh jyldan beri joımaı kele jatqan kemshilikter bar. Tipti joıýǵa tyryspaıdy da. Іshki ister mınıstrligi, kólik prokýratýrasy, avıatsııa ákimshiligi shara qoldanady», - dep qosty Bolat Naýryzálıev.

Onyń aıtýynsha, Almaty túbinde qulaǵan Fokker 100-diń ekıpajy ushaq qanatyn óńdemegen.