Almaty áýe aılaǵynyń mańynda zańsyz salynǵan 23 turǵyn úı áli tur – Bas prokýratýra
ASTANA. QazAqparat – Almaty áýe aılaǵynyń mańynda zańsyz salynǵan 23 turǵyn úı áli tur. Bul jaıynda QR Bas prokýrory Berik Asylovtyń Májilis depýtattarynyń saýalyna joldaǵan jaýabynda aıtylǵan, dep habarlaıdy QazAqparat tilshisi.
«2021 jyldyń qazan aıynda Aazamattyq avıatsııa komıtetiniń mamandary atalǵan əýejaıdyń ushý jolaǵyna zertteý júrgizdi. Onda əýeaılaqtardy paıdalanýdyń jaramdylyǵy normadan aýytqyǵany anyqtaldy», - dep jazady Berik Asylov.
Biraq tekserý kezinde anyqtalǵan kemshilikter joıylmaǵanyna qaramastan komıtet ókilderi áýe aılaǵyna jaramdylyq sertıfıkatyn bergen.
«Tekseris qorytyndysy boıynsha anyqtalǵan buzýshylyqtar joıylǵan jaǵdaıda qoldanylý merzimi shekteýli (20.04.2023 jylǵa deıin) əýeaılaqtyń jaramdylyq sertıfıkatyn berý týraly sheshim qabyldandy. Qazirgi ýaqytta atalǵan buzýshylyqtar əýeaılaq aýmaǵyna jaqyn 23 turǵyn úı qurylysynyń ornalasýyna baılanysty joıylmaǵan», - delingen Bas prokýrordyń jaýabynda.
Eske salsaq, byltyr sáýir aıynda QR Indýstrııa jáne ınfraqurylymdyq damý mınıstrliginiń baspasóz qyzmeti Bek Air áýe kompanııasynyń Fokker-100 áýe kemesine qatysty oryn alǵan avıatsııalyq oqıǵany tekserý jumystary aıaqtalǵanyn málim etken edi.
Al 2021 jyldyń mamyrynda Almatydaǵy áýe aılaǵynyń mańaıynda jerdi zańsyz satqandar sottalǵan bolatyn.
Almaty áýejaıy apatqa ushyraǵan «Bek Air» ushaǵynyń sońǵy sátteriniń hronologııasyn jarııalaǵan bolatyn.
