«Almaty» aýdandyq ákimdiginiń ǵımaraty balabaqsha úshin bosatyldy - Astana
ASTANA. Naýryzdyń 2-si. QazAqparat /Gúlnár Jandaǵulova/ - Elordalyq «Almaty» aýdanynyń ákimdigi ǵımaratyn balabaqsha úshin bosatyp berýde,
dep habarlady ákimdiktiń baspasóz qyzmetinen.
Memlekettik organdarǵa ózi ornalasqan burynǵy balabaqsha ǵımarattaryn bosatý týraly tapsyrma berilgeni barshaǵa aıan. Bul - mektepke deıingi daıyndyq mekemeleriniń jetispeýshiligin tómendetýge baǵyttalǵan «Balapan» baǵdarlamasynyń bir sharasy.
Kezinde Astanaǵa qonys aýdarǵan memlekettik mekemelerge berilgen ǵımarattardy qaıtarý sharasy jalpy eseppen osyndaı 14 nysandy bosatýǵa múmkindik beredi, delingen habarlamada. Al bul 3 myńdaı balaǵa arnalǵan oryn. Osyndaı ǵımarattardyń birin «Almaty» aýdany ákiminiń apparaty ıelenip kelgen bolatyn. Qaıta jańartý jumystarynan keıin bul nysanǵa jańa balabaqsha ornalasady, al ákimdikke Sol jaǵalaýdan Táýelsizdik dańǵyly, 7 úı meken-jaıy boıynsha ǵımarat berilip otyr.
Aıta ketý kerek, aýdandyq ákimdiktiń telefondary ózgergen joq.
