«Almaty-Atyraý» poıyzynda 39 balanyń ýlanýyna oraı júrgizilgen tekseriste vagon-meıramhanadan «E.Coli» ishek taıaqshasy tabyldy
ASTANA. 12 tamyz. QazAqparat /Qanat Mámetqazyuly/ - Kólik prokýratýrasy organdary 2001 jylǵy 28 shildede «Almaty-Atyraý» baǵyty boıynsha júretin № 41 jolaýshylar poıyzynyń vagon-meıramhanasynda 39 balanyń ýlanýy faktisi boıynsha tekserýdi aıaqtady.
Bul týraly QR Bas prokýratýrasynyń baspasóz qyzmetinen habarlandy.
«Saǵynaev» jeke kásipkerligi jalǵa alǵan vagon-meıramhanasyn tekserý barysynda sanıtarlyq-epıdemıologııalyq normalardyń buzylǵany anyqtaldy. Bul rette vagonda ystyq aǵyndy sý bolmaǵan, et ónimderine arnalǵan sertıfıkat joq, tamaq ónimderin saqtaýǵa arnalǵan tońazytqysh jabdyqtary jaramsyz kúıde bolǵany anyqtaldy. Sanıtarlyq-epıdemıologııalyq saraptama jáne balalardan alynǵan aǵyndy sý qaldyqtaryn mıkrobıologııalyq zertteý nátıjeleri boıynsha ishek aýrýyna ákep soǵýdyń negizgi sebebi bolyp tabylatyn «E.Coli» ishek taıaqshasy tabyldy. Shıkileı tartylǵan etterden jáne vagon-meıramhanasy aspazynyń qolynan alynǵan juǵyndylardan da ishek taıaqshasy tabyldy», - delingen baspasóz baıanynda. Al sanıtarlyq-epıdemıologııalyq qadaǵalaý mamandarynyń qortyndylary boıynsha balalardyń ishek aýrýyna ushyraýy jolaýshylar poıyzynyń vagon-meıramhanasynan tamaqtaný saldarynan bolǵan. Osyǵan oraı, Qyzylorda kólik prokýratýrasy QR Qylmystyq kodeksi 267-babynyń 1-bóliginde kózdelgen qylmys belgileri boıynsha qylmystyq is qozǵady.
Esterińizge sala keteıik, 28 shilde kúni Qyzylorda oblysy Belkól stansasynda taǵamnan ýlaný belgilerimen oqys syrqattanýyna baılanysty 39 bala «Almaty-Atyraý» jolaýshylar poıyzynan túsirilgen bolatyn. Ýlanǵandardyń 27 shilde kúni jolaýshylar poıyzynyń vagon-meıramhanasyndaǵy as mázirinen tamaqtanǵany belgili boldy.
