Almaty atmosferasynyń ortasha lastaný ındeksi jyl saıyn tómendep keledi
ALMATY. 14 qańtar. QazAqparat /Erbol Turymbetov/ - «Qazgıdromet» respýblıkalyq memlekettik kásipornynyń «Almaty qalasy Gıdrometeorologııalyq monıtorıngi ortalyǵy» enshiles memlekettik kásipornynyń málimeti boıynsha,
atmosferanyń ortasha lastaný ındeksi (ALI5) 2010 jyly 11,7-ni quraǵan. Bul aldyńǵy jylmen salystyrǵanda (12,9) tómen kórsetkish.
Almaty qalasy ákimdiginiń «2009-2018 jyldarǵa arnalǵan Almaty qalasynda qorshaǵan ortanyń lastanýyn tómendetý jónindegi» keshendi baǵdarlamasy júrgizilýde. Onyń aıasynda aýaǵa zııandy zattar shyǵaryndylaryn azaıtýǵa baǵyttalǵan sharalar júzege asyrylýda.
Búginde Almaty qalasynda arnaıy tabıǵatty paıdalaný rejiminde qyzmet jasap otyrǵan 2223 kásiporyn bar, onyń ishinde І sanattylary - 15, ІІ sanattylary - 106, ІІІ sanattylary - 474 jáne ІV sanatylary - 1628. Al bulardyń ishinde negizinen aýany lastaıtyndar І jáne ІІ sanattaǵy kásiporyndar bolyp otyr.
Almaty qalasy aýmaǵynda atmosferalyq aýaǵa turaqty jáne jyljymaly kózderden taraıtyn lastaýshy zattardyń jyldyq shyǵaryndylarynyń kólemi 2008 jyly 237116 tonnany quraǵan, onyń ishinde, 47016 tonnasy qaladaǵy jeke turǵyn úı sektory, al qalǵany JEO-2 úlesin qosa eseptegende, kásiporyndar men uıymdardyń turaqty kózderinen taraǵany anyqtaldy.
Qazirgi ýaqytta qala atmosferasynyń lastanýyna avtokólikter aıtarlyqtaı áser etýde. Búginde Almaty qalasynda 520 myńnan astam avtokólik tirkelgen. Oǵan qosa, kún saıyn qalaǵa syrttan 200 myńǵa deıin kólik kiredi eken. Byltyr ótkizilgen «Qalamyzǵa taza aýa» aılyǵynda tútin men ýly gazdyń qalypty jaǵdaıyn tekserý barysynda, qalada júrgen 7140 avtokólik quraly tekserilip, onyń 2649, ıaǵnı jalpy sanynyń 30 paıyzynda qalypty mólsherden aýytqýshylyq anyqtalǵan. Tekserý nátıjesi boıynsha, avtokólik ıelerine 7 mln. 31 myń teńge aıyppul salynǵan.
