Almaty ataqty kompozıtor Erkeǵalı Rahmadıevti aqtyq saparǵa shyǵaryp saldy
ALMATY. 11 sáýir. QazAqparat - Búgin Almaty ataqty kompozıtor, kórnekti memleket jáne qoǵam qaıratkeri Erkeǵalı Rahmadıevti aqtyq saparǵa shyǵaryp saldy. Marqummen qoshtasý kóptegen jyldar boıy sahnasynda onyń shyǵarmalary shyrqalǵan Abaı atyndaǵy Qazaq memlekettik akademııalyq opera jáne balet teatrynda ótti.
Qazaqstandyq ónerdiń metrimen qoshtasýǵa QR Mádenıet jáne aqparat mınıstri Muhtar Qul-Muhammed, Almaty ákimi Ahmetjan Esimov, QR Parlamentiniń depýtattary, eldiń shyǵarmashylyq odaqtary men mekemeleriniń basshylary, kompozıtoryń áriptesteri jáne shákirtteri, myńdaǵan almatylyqtar keldi.
Mınıstr Erkeǵalı Rahmadıevtiń jarqyn ómir joly men shyǵarmashylyǵy týraly áńgimelep, el Prezıdenti N.Nazarbaevtyń kóńil aıtý jedelhatyn oqyp berdi. Memleket basshysy kompozıtordyń ulttyq mýzyka óneri men mádenıetine qosqan zor úlesin, onyń uıymdastyrýshylyq jáne basshylyq talantyn atap ótti.
A.Esimov Erkelǵalı Rahmadıevtiń búkil shyǵarmashylyq taǵdyry Almatymen baılanysty bolǵanyn atap kórsetti: osynda onyń qalyptasý joly ótti, munda ol iri mádenıet mekemelerin basqardy, óziniń shyǵarmalaryn jazdy. Ol ómirden qarapaıym mádenıet qaıratkeri ǵana emes, óz eliniń naǵyz azamaty retinde ótti, dep atap ótti ákim.
«Bizdiń ulttyq mádenıetimiz shyn máninde úlken qaıǵyǵa dýshar boldy. Ol operalyq teatrǵa arnap shyǵarmalar jazǵan birden-bir kompozıtor edi. Meniń búkil ómirim onyń ónerimen baılanysty boldy», - dedi KSRO halyq ártisi, ataqty opera ánshisi Roza Jamanova.
E. Rahmadıev 1932 jyly 1 tamyzda Semeı oblysynyń (qazirgi Shyǵys Qazaqstan oblysy) Shubartaý aýdanyndaǵy Mádenıet aýylynda dúnıege kelgen. 1957 jyly Almaty konservatorııasyn bitirdi.
Qazaq KSR ónerine eńbek sińirgen qaıratker (1967). Qazaq KSR halyq ártisi (1976). KSRO halyq ártisi (1981). 2010 jyly oǵan «Qazaqstannyń Eńbek Eri» ataǵy berildi. 27 jyl boıy Qazaqstan Kompozıtorlar odaǵynyń tóraǵasy, KSRO Kompozıtorlar odaǵynyń hatshysy boldy.
Onyń shyǵarmalarynda qaharmandyq-patrıottyq taqyryp negizgi oryn alady, onda qazaq halyq mýzykasynyń baı murasy men klassıkalyq mýzyka óneri sheber paıdalanylǵan. Rahmadıevtiń sımfonııalyq, operalyq, vokaldy-aspaptyq, kameralyq shyǵarmalary kásibı ulttyq ónerdiń órisin keńeıtip, janrlyq salalaryn baıytty. Kompozıtordyń «Qamar sulý», «Alpamys», «Tyń tynysy» operalarynyń, «Amangeldi», «Tolǵaý», «Daırabaıdyń kúıi», «Meıram kúni», «Qudasha-dýman», «Ortpa» sımfonııalyq poemalary, «Sálem saǵan Aıastan», «Merekelik kantata», «Konstıtýtsııa týraly poema» kantatalary, horǵa arnalǵan vokaldyq shyǵarmalary, kóptegen án-romanstary Qazaqstanda jáne shetelderde joǵary baǵasyn aldy.
E.Rahmadıev «Keńsaı» beıitine jerlendi.
